Vestmannaeyjabær setti á laggirnar sundnámskeið fyrir börn í 1. -4. bekk vegna lokunar á sundlauginni í vetur. Viðgerðir á sundlaugunni drógust og stóð lokunin yfir í nokkra mánuði. Af þeim sökum hafa grunnskólanemendur ekki getað stundað hefðbundið skólasund í vetur. Skráningin á námskeiðið gengur vel og eru hátt í hundrað börn skráð. 

Fram kemur á vef Vestmannaeyjabæjar að rúmlega 95 börn á aldrinum 6-10 ára eru skráð á námskeiðið sem telst afar góð þátttaka og sýnir mikinn áhuga barna og forráðamanna.

Námskeiðið hefst strax að loknu páskaleyfi og mun standa yfir í nokkrar vikur. Stefnt er að því að hvert barn fái sex skipti með sundkennara á meðan á námskeiðinu stendur. Sundkennari verður Svanhildur Eiríksdóttir sem hefur mikla reynslu af sundkennslu ungra barna.

Forráðamenn munu fá tölvupóst á allra næstu dögum með nánari upplýsingum um hópaskiptingu og tímasetningar.