„Ég er mjög hugsi eftir þessi ummæli 1. þingmanns Suðurkjördæmis, stjórnarþingmannsins Ásthildar Lóu Þórsdóttur á þinginu í gær. Þar gerir hún gerir lítið úr þeim 26 sjávarútvegssveitarfélögum sem hafa skilað inn umsögn af því að þau eru ekki meirihluti sveitarfélaga á landinu og þá á ekki að hlusta á þeirra áhyggjur,“ segir Íris Róbertsdóttir á Fésbókarsíðu sinni í dag.

„En þetta eru ÖLL sjávarútvegssveitarfélögin og atvinnuveganefndin óskaði bara eftir umsögn frá þessum sveitarfélögum um frumvarpið, enda eiga hin 36 sem Ásthildur Lóa nefnir lítilla eða engra hagsmuna að gæta.

Gagnkvæm virðing og góð samskipti mikilvæg

Skyldi ríkisstjórnin hugsa eins varðandi önnur mál sem eru í þinglegri meðferð? Ef t.d. öll sveitarfélög á landinu nema þau sex sem tilheyra höfuðborgarsvæðinu eru sammála um eitthvað tiltekið mál ætti þá að hunsa umsagnir hina sex sveitarfélaganna og þeirra skoðun? Ég trú því ekki að það sé raunin enda fyndist mér það ekki góður bragur á neinu máli.

Ég vona svo sannarlega að þingmaðurinn sem er með þrjú mjög stór sjávarútvegssveitarfélög í sínu kjördæmi hlusti á athugasemdir þeirra og annarra sveitarfélaga og kynni sér þau sjónarmið sem þar koma fram.

Það færi vel á því að hún myndi draga þessi ummæli til baka þar sem ég veit að öll þau sveitarfélög sem senda inn umsagnir, um hin fjölmörgu mál, til nefnda Alþingis gera það af fagmennsku og til að huga að og tryggja hagsmuni sinna íbúa. Gagnkvæm virðing og góð samskipti eru mikilvæg fyrir alla aðila,“ segir Íris um þennan fyrsta þingmann Suðurkjördæmis og okkar Eyjamanna. Skelfilegt.