Það var lið HK sem sigraði Þrótt frá Reykjavík í úrslitaleik um Orkumótstitilinn í ár. Þessi lið mættust einnig í úrslitaleiknum 2024. Þá fór Þróttur með sigur af hólmi.

Fram kemur á heimasíðu mótsins að sigurinn í gær hafi verið torsóttur hjá HK. HK komst yfir í fyrri hálfleik með marki frá Kristófer Aroni Kristjánssyni, en Þrótturum óx ásmeginn eftir því sem líða tók á leikinn og náðu að jafna í síðari hálfleik með marki Jakobs Steins Valdimarssonar. Það þurfti því að framlengja leikinn en þrátt fyrir góð tilþrif tókst liðunum ekki að bæta við mörkum í framlengingunni. Því varð að grípa til vítaspyrnukeppni og það var líkt og peyjarnir hefðu ekki gert annað en að æfa vítaspyrnur því 15 fyrstu spyrnurnar rötuðu í markið en eitthvað varð að láta undan og fór 16. spyrnan í markstöngina og HK því Orkumótsmeistari 2025.

Bæði lið eiga heiður skilinn fyrir frábæran leik. Veðrið lék við mótsgesti og lauk mótinu í glampandi sól. Við vonum því að keppendur fari heim á leið með sól í hjarta og góðar minningar frá mótinu, segir í frétt á orkumotid.is. Sigfús Gunnar Guðmundsson myndaði úrslitaleikinn og fögnuðinn í leikslok.