,,Jæja, nú eruð þið hjá Vinstri grænum búin að vera. Þið eruð komin niður í 3 eða 4% fylgi og fáið ekki mann á þing í kosningunum í lok mánaðarins.“ Þessa athugasemd fékk ég að heyra nú á dögunum frá ágætum vini mínum.
,,Æ, hvað það yrði slæmt, ekki bara fyrir Vinstri græn, heldur fyrir allan almenning í landinu,“ sagði ég.
,,Hvernig þá?“ var spurt á móti.
- Hvaða flokkar ætlar að taka við forystu Vinstri grænna um málefni sem varða kvenfrelsi, kvenréttindi og jafnrétti á breiðari grunni? Um þessar mundir er sífellt vegið af meira miskunnarleysi að konum á fjölmörgum sviðum.
- Hvaða flokkar ætlar að taka við forystu Vinstri grænna að berjast gegn árásum á hina félagslegu þætti og kerfi samfélagsins með því að svelta þessa þætti þar til í óefni er komið og bjóða þá fjármagnseigendum þá í einkarekstur sem gerir ekkert annað en að auka kostnað almennings að samfélagslegri þjónustu?
- Hvaða flokkar ætlar að taka við forystu Vinstri grænna um að berjast fyrir því að hækka skatta á ríkasta 1% landsmanna, úr vösum þeirra sem geta í þágu þeirra sem þurfa?
- Hvaða flokkar ætlar að taka við forystu Vinstri grænna í náttúruvernd og umhverfismálum og koma í veg fyrir að bæði innlendir og erlendir fjárfestar eignist landið sem fram til þessa á að heita sameign þjóðarinnar?
- Hvaða flokkar ætlar að taka við forystu Vinstri grænna um að tryggja í stjórnarskrá að auðlindir í og við landið séu sameign þjóðarinnar en ekki einkaaðila?
- Hvaða flokkar ætla að taka við forystu Vinstri grænna í friðarmálum og baráttu kúgaðra þjóða gegn ofurefli kúgara sinna?
Með öðrum orðum, ég held að það væri vond niðurstaða fyrir almenning í þessu landi ef rödd Vinstri grænna þagnaði á Alþingi. Ég bið þig, ágæti lesandi, að íhuga þessi mál vel og meta.
Ragnar Óskarsson
