Karlalið ÍBV tapaði 4-2 gegn Fylki

Karlalið ÍBV í fótbolta lék í þriðju umferð Lengjubikars karla gegn Fylki í kvöld. Leiknum lauk með 4-2 sigri Fylkis.

Eyjamenn komust í 0–1 með marki frá Hermanni Þór Ragnarssyni á 28. mínútu. Fylkismenn jöfnuðu á 40. mínútu. Vicente Valor kom ÍBV yfir á nýjan leik rétt fyrir hálfleiksflautið. Fylkismenn svöruðu hins vegar með þremur mörkum og lokastaðan 4-2 fyrir Fylki.

ÍBV er í fimmta sæti í riðli 4 í A-deild, með fjögur stig. Eyjamenn eiga eftir að spila gegn Breiðablik og Þrótti en þeir leiktímar hafa ekki verið staðfestir.

Kvennalið ÍBV tapaði gegn Breiðablik

Kvennalið ÍBV spilaði í þriðju umferð Lengjubikarsins gegn Breiðablik í gærkvöld. Leiknum lauk 7-0 sigri Breiðabliks. 

Nokkuð vantaði í lið Eyjakvenna en lykilleikmennirnir Allison Patricia Clark, Sandra Voitane og Kristín Klara Óskarsdóttir voru ekki á leikskýrslu í leiknum. Allison og Sandra glíma við meiðsli og Kristín Klara er í verkefni með u-17 ára landsliði Ísland. 

ÍBV er í neðsta sæti í riðli 2 í A-deild, með eitt stig. Þær eiga eftir að spila einn leik til viðbótar og er hann gegn Víking Reykjavík.