Fyrr í mánuðinum samþykkti bæjarstjórn Vestmannaeyja að fara í íbúakosningu til að kanna hug íbúa, hvort hefja skuli vinnu við að byggja upp þróunarsvæðið M2 sem fór undir hraun í gosinu árið 1973 eða ekki. Fram kom í bókuninni að stefnt sé að því að íbúakosningin fari fram samhliða næstu alþingiskosningum.

Þar kom einnig fram að íbúakosning verði framkvæmd áður en lagt verði af stað í skipulagsvinnuna en ekki á miðri leið eða að henni lokinni. Eyjar.net óskaði þrátt fyrir þetta eftir svörum frá Írisi Róbertsdóttur, bæjarstjóra um ákveðna þætti vegna málsins. Spurningar sem margir vilja hafa hugmynd um áður en gengið verður til kosninga um málið.

Líkt og hver sé áætlaður kostnaður við framkvæmdina, hversu mikið magn í rúmmetrum talið þurfi að fjarlægja, hvar hraunið verði sett sem mokað verður burt, hversu stór lóð verði í boði eftir moksturinn og hversu mikið byggingarmagn sé um að ræða.

Íris segir að það sem spurt sé um liggi eðlilega ekki fyrir og það sé einmitt kjarni málsins.

„Þess vegna viljum við fara í íbúakosningu ÁÐUR en lagt er í þann kostnað og fyrirhöfn sem fylgir því að vinna aðalskipulag og deiliskipuleggja í framhaldi, þá er hægt að svara þeim spurningum sem þú telur upp. Enda er verið að spyrja um svæði sem ekki kæmi inn í aðalskipulag fyrr en í fyrsta lagi eftir áratug eða seinna.

Ef meirihluti íbúa í Vestmannaeyjum vill ekki að þetta svæði verði nýtt til uppbyggingar þá verður það ekki tekið með í framtíðarskipulag og best er að vita það ÁÐUR en einhver vinnan hefst. Tillagan um íbúakosningu um þetta mál var samþykkt samhljóða í bæjarstjórn.“

segir Íris Róbertsdóttir, bæjarstjóri Vestmannaeyja.

https://eyjar.net/samthykkt-ad-kanna-hug-ibua/

https://eyjar.net/2022-03-29-deilt-um-midbaejarskipulag-i-skipulagsradi/