„Íris Róbertsdóttir, bæjarstjóri Vestmannaeyja og oddviti H-listans, Fyrir Heimaey, ætlar að ganga í Sjálfstæðisflokkinn. Þetta staðfestir Íris í samtali við fréttastofu RÚV. Íris segist þó ekki ætla í prófkjör fyrir flokkinn í vor, en framboðsfrestur rann út klukkan sex í kvöld.

Þetta verða að teljast mikil tíðindi en fyrr í dag var á félagsfundi Fyrir Heimaey ákveðið  að félagið byði ekki fram. Það bauð fram undir nafni H-listans 2018 og var klofningsframboð úr Sjálfstæðisflokknum. H-listinn undir forystu Írisar hefur verið í meirihluta í tvö kjörtímabil í samfloti með Eyjalistanum.

Sjálf ætlar Íris ekki í framboð og segir ekki búið að semja um að hún verði bæjarstjóraefni Sjálfstæðisflokksins en muni taka afstöðu  komi til þess. Hún segir að mikið hafi gerst í dag. Fólk sem var með henni í framboði fyrir H-listann bjóði sig fram í prófkjöri Sjálfstæðisflokksins. „Og ég mun ganga í flokkinn og styðja gott fólk í komandi prófkjöri,“ segir Íris við RÚV.