Hann var ansi sérstakur viðmælandinn sem blaðamaður Eyjafrétta rakst á í vikunni, það var enginn annar en hinn  uppátækjasami Hurðaskellir. Hann vildi endilega fræða blaðamann um nýja sýningu á Háaloftinu. “Ég er ótrúlega spenntur. Það er mjög gaman að fá að frumsýna þetta ævintýri hér í Eyjum. Ég meina, það er svo gott að komast burt frá fjöllunum… en óttist eigi, ég hef lofað Skyrgámi að skella engum hurðum á Háaloftinu! Ég vil bara hafa gaman!”

Jólasveinar ganga um gólf

Jólasveinarnir setja upp splunkunýja sýningu á Háaloftinu í Vestmannaeyjum sem ber heitið “Jólasveinar ganga um gólf.” Hurðaskellir lýsir henni sem “alvöru fjölskyldugaman.”

“Við erum óþreytandi! Við erum ekki bara að syngja þekkt jólalög, heldur erum við að segja grín-sögur og auðvitað leyfum við krökkunum að spyrja. Askasleikir sýnir færni sína í diskahreinsun og Skyrgámur reynir að stela öllum mjólkurafurðum á svæðinu – þetta er algjör pakki! Við hlökkum mikið til að sjá hvernig Eyjafólki líkar við þennan nýja viðburð,” segir Hurðaskellir.

Sýningin fer fram eftirfarandi daga:

• Föstudagur 6. desember

• Laugardagur 7. desember

• Föstudagur 20. desember

• Laugardagur 21. desember

Sýningarnar hefjast kl. 14:00 en húsið opnar hálftíma fyrr, kl. 13:30. Miðaverð er aðeins 2.500 krónur. Miðasala er á Tix.is: https://tix.is/event/20451/jolasveinar-ganga-um-golf.

Heimsóknarþjónusta jólasveinanna

Auk sýningarinnar bjóða félagarnir upp á víðtæka þjónustu á aðventunni. “Við erum í rauninni allt í öllu þegar kemur að jólagleði,” segir Hurðaskellir. “Við bjóðum upp á heimsóknir fyrir alla sem vilja. Við getum komið í skóla, á jólaskemmtanir fyrirtækja eða bara heim að dyrum. Ég elska að hitta krakka og heyra óskirnar þeirra. Og nei, ég reyni ekki að skella hurðum heima hjá fólki – þetta er fagmennska! Við erum bara hér til að gefa.”

Að lokum sendi Hurðaskellir hvatningu til Eyjafólks: “Fáið ykkur miða áður en ég verð freistandi að skella hurðinni á þetta samtal! Komið og njótið og skellum okkur öll í gott jólaskap á Háaloftinu.”