Knattspyrnumennirnir Jón Jökull Hjaltason og Róbert Aron Eysteinsson hafa ákveðið að framlengja samninga sína við félagið til næstu tveggja ára. Róbert Aron er uppalinn í Vestmannaeyjum þar sem hann hefur spilað með öllum flokkum félagsins en Jón Jökull er að hluta uppalinn hjá félaginu.
Róbert, sem er 22 ára miðjumaður, hefur spilað 61 leik fyrir ÍBV og KFS, í deild, bikar, meistarakeppni og Evrópudeild, og skorað í þeim fimm mörk. Á síðustu leiktíð meiddist Róbert illa og spilaði einungis fjóra leiki. Róbert var valinn efnilegasti leikmaður ÍBV árið 2019, þegar hann hlaut Fréttabikarinn.
Jón Jökull, sem er 20 ára miðjumaður, hefur spilað 28 leiki fyrir ÍBV og skorað í þeim tvö mörk. Hann lék 18 leiki í deildinni síðasta sumar þegar ÍBV tryggði sæti sitt í efstu deild. Jón hafði leikið með unglingaliði AGF áður en hann kom til Vestmannaeyja 2020.
ÍBV bindur miklar vonir við þessa tvo leikmenn sem koma til með að styrkja liðið í baráttunni í efstu deild karla í sumar.
