Síðdegis í dag undirrituðu Samtök atvinnulífsins og breiðfylking stéttarfélaga á almennum vinnumarkaði, Starfsgreinasambandið, Efling og Samiðn, nýjan kjarasamning. Um er að ræða langtímasamning sem gildir frá 1. febrúar 2024 til 31. janúar 2028.
Ríkið leggur til allt að 75%
Fram kom í tilkynningu frá ríkisstjórninni undir kvöld að útfærð verði leið til að skólamáltíðir grunnskólabarna verði gjaldfrjálsar frá og með ágúst 2024 til loka samningstímans.
Foreldrar greiða í dag að jafnaði um 12.000 krónur mánuði fyrir skólamáltíðir eins grunnskólabarns. Áætlað er að kostnaður við þetta nemi um 5 milljörðum króna á ársgrundvelli og mun ríkið leggja til allt að 75% kostnaðarins eða allt að 4 milljarða króna á ári á samningstímanum. Ríki og sveitarfélög munu útfæra verkefnið í sameiningu fyrir lok maí 2024. Til að meta árangur tilraunaverkefnisins verður óháðum aðila falið að leggja mat á framgang þess vorið 2026, sagði m.a. í tilkynningu stjórnvalda.
Útgjöld sveitarfélaga aukast um milljarð
Heiða Björg Hilmisdóttir, formaður Sambands íslenskra sveitarfélaga sagði fyrr í dag í samtali við RÚV að full sátt sé í stjórn sambandsins að auka útgjöld við skólamáltíðir.
Hún sagði jafnframt að kostnaður við skólamáltíðir sé níu til tíu milljarðar króna á ári. Hlutur sveitarfélaganna sé fjórir til fimm milljarðar á móti ríkinu. Með nýjum kjarasamningum aukast útgjöld þeirra um milljarð króna.
Vestmannaeyjabær greiddi um 9,5 milljónir með fæðiskostnaði í GRV í fyrra
Eyjar.net spurði fyrr í dag Jón Pétursson, framkvæmdastjóra fjölskyldu- og fræðslusviðs Vestmannaeyjabæjar um hversu mikil kostnaður væri í dag við fæði í GRV og hversu mikil útgjaldaaukningin yrði fyrir Vestmannaeyjabæ við þennan lið.
„Í fyrra greiddi Vestmannaeyjabær um 9,5 milljón með fæðiskostnaði í GRV. Kostnaður foreldra er um 38,5 milljón þannig að ef bæjarsjóður ætti að greiða það á fullu yrði kostnaður um 48 milljónir. Nú hef ég ekki séð þessar útfærslur en skilst að verið sé að tala um einhverja skiptingu á milli ríkis og sveitarfélaga og ríkið komi að 4/5 og sveitarfélagið 1/5. Hlutur Vestmannaeyjabæjar yrði þá svipaður og er í dag.“
Margar spurningar vakna
„Sjálfur hef ég meiri áhyggjur af hvað svona breyting getur leitt til. Verða fleiri sem nýta sér að kaupa fæði? Verður meiri matarsóun? Mun gæði martarins halda? Hvernig verður útfærslan á kostnaðarskiptingunni hjá ríkinu og heimtur á greiðslum? Mun ríkið standa við sinn hluta eða læða kostnaðinn smátt og smátt alfarið yfir á sveitarfélagið eins og við höfum reynslu af í öðrum málum? Hverjar verða kröfur á viðkomandi þjónustu? Það kemur margt annað upp í hugann. Tel betra að sveitarfélögin sjálf og ráðamenn þeirra hafi frið til að ákveða þjónustuna við sitt nærsamfélag en að það komi síendurtekið frá ríki eða nú stéttarfélögum í gegnum kjarasamninga. Hvar er sjálfstæði sveitarstjórnarstigsins?“
segir Jón Pétursson að endingu.
https://eyjar.net/adgerdir-stjornvalda-til-studnings-kjarasamningum/
