Á dögunum bárust sveitarfélögum landsins erindi frá Sambandi íslenskra sveitarfélaga, þar sem til stendur að fara í kerfisbundna söfnun ýmissa upplýsinga um starfsemi sveitarfélaga með miðlægum hætti í gegnum nýtt gagnalón. Samkvæmt Sambandinu er fyrsta skrefið á þeirri vegferð að sækja launaupplýsingar frá sveitarfélögum mánaðarlega. Um er að ræða umfangsmikla breytingu þar sem upplýsingar munu berast Sambandinu beint úr launakerfum sveitarfélaga. Til þess að þetta geti orðið að veruleika þurfa sveitarfélög/stofnanir annars vegar að uppfæra kjarasamningsumboð sín til Sambandsins og hins vegar að undirrita samkomulag um sameiginlega ábyrgð til samræmis við kröfur persónuupplýsingalaga.

Haldinn var kynningarfundur á umræddu fyrirkomulagi mánudaginn 28. nóvember sl. Þar komu fram margvíslegar áhyggjur fulltrúa sveitarstjórna af áformum Sambandsins um breytta upplýsingaöflun í tengslum við kjarasamningagerð. Niðurstaða fundarins var á þá leið að Sambandið skoðaði betur skyldur umboðsahafa samningsgerðar og sveitarfélaga.

Erindið var tekið fyrir í bæjarráði í síðustu viku og var niðurstaða rásins sú að á meðan enn er óljóst um endanlegt fyrirkomulag upplýsingaöflunar í tengslum við kjarasamningsgerð vill bæjarráð bíða með að undirrita samkomulagið þar til málið skýrist.

Bæjarráð getur hins vegar staðfest kjarasamningsumboðið frá 2. mars 2022, þar sem Sambandi íslenskra sveitarfélaga er veitt umboð til að annast allar kjaraviðræður við viðkomandi stéttarfélög starfsfólks Vestmannaeyjabæjar og samþykkir að áfram verði veittar sömu upplýsingar og áður, með sama hætti og verið hefur. Mun bæjarráð taka málið fyrir aftur þegar verklag við upplýsingaöflun skýrist frekar.

Kynningarbréf.pdf
Kjarasamningsumbod_2022.pdf
Samkomulag um sameiginlega ábyrgð.pdf