Nú er snjóhríðinni að mestu lokið í Vestmannaeyjum og óveðrið að mestu gengið niður. Talsvert hefur hlýnað eftir að leið á daginn en fyrir vikið er snjórinn blautari og þyngri og því erfiðari yfirferðar. Þess vegna er enn mjög þungfært í Eyjum þótt skyggnið sé orðið betra. Herjólfur sigldi samkvæmt áætlun síðari ferð sína í dag en ekki var farin fyrri ferðin sökum veðursins.