Nýtt fasteignamat fyrir árið 2026 liggur nú fyrir hjá Þjóðskrá. Fasteignamatið í Vestmannaeyjum hækkar um 11,1% milli áranna 2025 og 2026. Hækkar íbúðahúsnæði m.a. um 11,4% og atvinnuhúsnæði um 9,9% milli ára. Líkt og á mörgum stöðum á landinu hefur fasteignamat farið hækkandi í Vestmannaeyjum síðustu ár. Þetta kom fram á síðasta fundi bæjarráðs Vestmannaeyja.

Fyrir bæjarráði lá einnig erindi frá Félagi atvinnurekenda þar sem sveitarfélög eru m.a. hvött til að skoða það að lækka álagningarprósentu fasteignaskatts á atvinnuhúsnæði til að mæta hækkunum fasteignamats.

Undanfarin sex ár hefur bæjarstjórn Vestmannaeyja ákveðið að lækka álagningarhlutfall fasteignaskatta og skatturinn hefur því ekki hækkað í takti við hækkun á fasteignamati sem skilar sér í sanngjarnari álagningu fasteignaskatta til íbúa og fyrirtækja í Vestmannaeyjum.

Í niðurstöðu ráðsins segir að Bæjarráð muni gera tillögu um að lækka álagningarhlutfall fasteignaskatta við undirbúning fjárhagsáætlunar fyrir árið 2026. Bæjarráð fól fjármálastjóra að vinna útreikninga til að byggja tillögur á.