Framkvæmda- og hafnarráð Vestmannaeyja, ásamt bæjarráði, fór nýverið í skoðunarferð í móttökustöð Terra við Eldfellsveg. Í kjölfarið voru forsvarsmenn fyrirtækisins boðaðir á fund framkvæmda- og hafnarráðs þar sem farið var yfir stöðu mála. Arngrímur Sverrisson, framkvæmdastjóri viðskiptaþróunar Terra, og Daníel Edward Jónsson, rekstrarstjóri í Vestmannaeyjum, sátu fundinn og svöruðu fyrirspurnum ráðsmanna.

Meðal þess sem rætt var voru áhyggjur af umgengni á svæðinu, en kvartanir hafa borist um að flokkað sorp sé blandað saman og að ástand móttökustöðvarinnar sé óviðunandi. Þá var einnig farið yfir gjaldtöku vegna sorps og þær ábendingar sem bænum hafa borist frá íbúum.

Ráðið nýtti fundinn til að koma áhyggjum sínum á framfæri og kalla eftir úrbótum í umgengni og verklagi, með það að markmiði að bæta þjónustu og efla traust íbúa á fyrirkomulagi sorpmála í Vestmannaeyjum. Forsvarsmenn Terra veittu greinargóð svör og sögðust allir af vilja gerðir til að gera betur, segir í fundargerð framkvæmda- og hafnarráðs.