Sjálfboðaliðar og viðbragðsaðilar hafa standsett Herjólfsdal
Þjóðhátíðarnefnd og viðbragðsaðilar hafa unnið hörðum höndum í alla nótt og allan dag við að koma Herjólfsdal í samt horf eftir áskoranir næturinnar. Nýtt tjald hefur verið reist fyrir það sem þurfti að taka niður í gær og annað í dalnum er tilbúið fyrir dagskrá kvöldsins. Gert er ráð fyrir skaplegra veðri það sem eftir lifir helgarinnar og Herjólfsdalur, Þjóðhátíðarnefnd, starfsfólk og viðbragðsaðilar eru tilbúin. Brennan sem frestað var í gær hefur verið sett á dagskrá klukkan 22:00 annað kvöld sem hluti af kvöldvökunni.

Gestir gátu leitað skjóls fyrir veðrinu í Herjólfshöll í nótt og í dag hafa Vestmanneyingar keppst við að aðstoða gesti af fastalandinu við að leysa úr ýmsum verkefnum, eins og að þurrka fatnað og viðlegubúnað. Þar munaði mestu um átak Sigríðar Ingu Kristmannsdóttur sem kallaði eftir aðstoð í Facebook-hópnum Kvenfólk í Eyjum þar sem tugir einstaklinga buðust til að hjálpa gestum að þurrka fatnað og viðlegubúnað.

„Þetta er bara hægt vegna þess að hér hópast Eyjamenn í tugatali, nánast óumbeðnir, og aðstoða okkur sem fyrir erum í þessum verkefnum,“ segir Jónas Guðbjörn Jónsson, formaður Þjóðhátíðarnefndar. „Samtakamátturinn í þessu samfélagi er ómetanlegur.“

Þrátt fyrir allar þessar áskoranir hefur sama sem ekkert þurft að gera í sjúkraaðstöðu fyrir hátíðargesti, og brekkan – sem oft verður illa leikin eftir miklar rigningar – er nánast eins og ný. Þá hefur Icewear opnað verslun í dalnum þar sem gestir geta nálgast þurran fatnað.

Herjólfur sendi frá sér yfirlýsingu um miðjan dag þess efnis að ófært væri til Landeyjahafnar vegna aðstæðna í höfninni. Því falla síðdegisferðirnar kl. 17:00 frá Vestmannaeyjum og kl. 18:00 frá Landeyjahöfn niður. Ákvarðanir um framhaldið verða teknar þegar nýjar spár liggja fyrir.

Myndir Óskar Pétur.

Frétt frá ÍBV.

Brekkan græn og fín á laugardegi..