Viska stendur fyrir saumanámskeiði í Hvíta húsinu dagana 23.-25. október.

Námskeiðið er hugsað bæði fyrir byrjendur og lengra komna og munu nemendur meðal annars læra hvernig á að taka upp snið, grunnatriði við breytingar og svo framvegis. Þátttakendur munu svo sauma sér flík að eigin vali. Kennari námskeiðsins er klæðskera- og kjólameistarinn Selma Ragnarsdóttir.

,,Ég legg mikið upp úr grunnþáttunum og að nemendur kunni að nýta sér saumavélina og sníðablöð á sjálfstæðan hátt. Farið verður í atriði eins og húsmæður hér áður fyrr kunnu líklega flestar eins og og stytta, þrengja eða skipta um rennilás í flíkum. Svo eru þau sem eru lengra komin þá er allt opið að hanna og sauma flíkur frá grunni. Fer algjörlega eftir hvað nemandinn vill fá út úr þessu 12 klukkustunda saumanámskeiði. Námskráin er opin og verður aðlöguð að hverjum og einum. Æskilegur fjöldi í hópnum eru 6-10 nemendur og þurfa nemendur að koma með eigin saumavélar.”

Við fengum að spyrja Selmu nokkurra spurninga varðandi hennar feril.

Hvernig kviknaði áhuginn þinn í upphafi að byrja að sauma og hanna föt?

Hann kviknaði mjög snemma, líklega upp úr 11 ára aldri þegar ég og vinkona mín Jóhanna vorum að brasa við að setja saman flíkur á saumavélina hennar ömmu á Dverghamrinum. Þá hafði ég kynnst og fylgst með t.d. Dóru Einars fata- og búningahönnuði sem hannaði flestallt fyrir Stuðmenn og Grýlurnar á þessum tíma og var hún mikill áhrifavaldur í mínu lífi. Einnig byrjaði ég snemma að breyta flíkum frá ömmu og langömmu. Þar höfðu erlendar poppstjörnur þessa tíma líka stór áhrif.

Hvaðan færðu helst innblástur fyrir hönnun þína?

Mjög mikið frá fólkinu á götunni, þar sem ég bý í miðbæ Reykjavíkur þá eru alltaf einhverjar skemmtilegar týpur á ferðinni. Einnig hafa aðrir hönnuðir og listamenn stór áhrif sem oft opna nýjar víddir svo ekki sé talað um nemendur mínir í Listaháskólanum. Þar er sköpunarflóð alla daga sem gaman og hvetjandi er að fylgjast með og vera partur af því að framkvæma. Að sjálfsögðu er ógrynni af síðum á netinu, Instagram og Pintrest t.d. sem gaman er að skoða og fá nýja sýn á hlutina og aðferðir við fatagerð. Innblástur hverrar hönnunar er að mestu samvinna við kúnnann, áhrif frá fyrri verkefnum og þekking og verkleg kunnátta í gegnum tíðina.

Hvernig myndir þú lýsa þínum persónulega fatastíl? 

Held hann sé að flestu leyti litríkur, tilviljunarkenndur og laus við alla merkja tilgerð. Er voða lítið fyrir að elta blint einhvern stíl, áhrifavalda eða tísku hverju sinni, heldur reyni að nýta sem mest af því sem ég á fyrir og breyta og bæta og þannig skapa minn persónulega stíl. Það kallast að „up-cyclea“ í dag en það er langt síðan að ég tileinkaði mér þennan háttinn á að nýta fatnað til hins ýtrasta. Ef ég versla mér fatnað þá er það yfirleitt í „second hand“ verslunum.

Hvert er þitt uppáhalds tímabil í tísku?

Ég verð nú að segja 80´s tímabilið (níundi áratugurinn) þar sem ég var unglingur á þessum tíma og var að móta minn eigin fatastíl, meðvitað og ómeðvitað, út frá tónlist og áhrifavöldum þess tíma. Samt er nútíminn líka skemmtilegur og spennandi þar sem mikil vakning er loksins í sjálfbærri hugsun sem ég styð heilshugar. Flest okkar eigum allt of mikið af fatnaði og mörg okkar versla drasl flíkur fyrir lítinn pening, sem notaðar eru stutt eða jafnvel ekki og svo hent, sem endar í eitruðum landuppfyllingum út í heimi. Ég vona að þessi umhverfisvæna hugsun tengdum fatnaði eigi bara eftir að eflast og þróast.

Frekari upplýsingar um námskeiðið má nálgast hér.