Herjólfur stefnir á að sigla til Landeyjahafnar seinnipartinn í dag eina ferð, segir í tilkynningu frá Herjólfi ohf., en undanfarna daga hefur ferjan þurft að sigla í Þorlákshöfn. Brottför er frá Vestmannaeyjum kl. 16:00 og frá Landeyjahöfn kl. 20:15.

Hvað varðar siglingar fyrir morgundaginn verður gefin út tilkynning fyrir kl. 06:00 í fyrramálið. Á þessum árstíma er alltaf hætta á færslu milli hafna og því ekki æskilegt að skilja eftir farartæki í annarri hvorri höfninni, segir að endingu í tilkynningu skipafélagsins.

Sandæluskipið Álfsnes var komið á svæðið undir morgun, en dýpka þarf töluvert í og við höfnina svo hægt sé að sigla fleiri áætlunarferðir í Landeyjahöfn.