Ráðstefna Eyjafrétta um veiðigjaldafrumvarp ríkisstjórnarinnar

„Mig langar að skýra aðeins frá áhrifum á Skipalyftuna. Breytingar þær sem eru fyrirhugaðar á veiðigjöldum koma til með að hafa áhrif á fyrirtæki sem byggja þjónusta sína á viðskiptum við sjávarútvegsfyrirtæki. Er Skipalyftan í þeim hópi,“ sagði Stefán Örn Jónsson, framkvæmdastjóri Skipalyftunnar á ráðstefnu Eyjafrétta í Akóges um veiðigjaldafrumvarp ríkisstjórnarinnar síðasta fimmtudag.

Komu fram hjá honum eins og öðrum sem töluðu á ráðstefnunni áhyggjur af framtíð í sjávarútvegi verði frumvarp ríkisstjórnarinnar að veruleika. „Við vitum ekki hvað áhrifin koma til með að verða mikil en það er eins í svona gjörningum sem og öðrum, óvissan er alltaf verst.“

Stefán sagði alveg ljóst að verði þessi hækkun að veruleika muni sjávarútvegsfyrirtækin draga saman í fjárfestingum og viðhaldi. „Það mun hafa mikil áhrif á þjónustufyrirtækin í Eyjum. Í Skipalyftunni starfa um 45 manns. Sem betur fer er  oftast nóg að gera en það koma tímar sem okkur vantar verkefni. Til dæmis hefur loðnubresturinn haft áhrif á starfsemina. Það vita allir, engin loðna þýðir samdrátt í öllu í Vestmannaeyjum.

Ef allt fer á versta veg, frumvarp ríkisstjórnarinnar nær fram  verður samdráttur. Við gætum staðið frammi fyrir því að þurfa jafnvel að segja upp fólki. Það verður ekki auðvelt og við gerum okkur grein fyrir því að  ruðningsáhrifin fara upp allt samfélagið í Eyjum,“ sagði Stefán.

Hann sagði sjávarútvegsfyrirtækin hér í Eyjum, Ísfélagið og Vinnslustöðina hafi verið mjög öflug við uppbyggingu í sínum fyrirtækjum sl. ár. „Þau hafa mikið nýtt þjónustu sem er í boði hér í Eyjum. Höfum við notið góðs af því. Við vitum að slík uppbygging heldur áfram ef aðstæður leyfa. Við vitum líka að ef þessar breytingar fara í gegn kemur það harkalega niður á okkur og fyrirtækjum í Vestmannaeyjum,“ sagði Stefán að lokum.