Í dag kl. 14:00 fer fram stærsti leikur tímabilsins til þessa í Olísdeild kvenna þegar ÍBV tekur á móti Val í Íþróttamiðstöð Vestmannaeyja. Þar mætast tvö sterkustu lið deildarinnar í hreinum toppslag. Liðin eru jöfn á toppnum með 22 stig eftir 13 umferðir.

Valur trónir á toppnum með markatöluna 405–304 (+101) á meðan ÍBV hefur skorað flest mörk allra liða í deildinni, 407, og er með markatöluna 407–342. Tölurnar undirstrika styrkleika beggja liða og gera ljóst að hér er um sannkallaðan stórleik að ræða þar sem vart má greina á milli liðanna.

Heimavöllurinn getur skipt sköpum

Leikið er í Eyjum og þar hefur kvennalið ÍBV notið öflugs stuðnings áhorfenda í vetur. Í svona jöfnum og mikilvægum leik getur stemningin í húsinu ráðið úrslitum. Handknattleiksráð ÍBV hvetur því alla Eyjamenn til að fjölmenna á leikinn, fylla húsið og styðja stelpurnar af krafti.

Viðureignir ÍBV og Vals hafa undanfarin ár oft boðið upp á mikla spennu, hraðan og baráttumikinn handbolta og ekkert bendir til annars en að það sama verði upp á teningnum á laugardaginn. Mikilvæg stig eru í húfi og sigur gæti reynst dýrmætur þegar líður á keppnistímabilið.

Skapa alvöru Eyjastemningu

Leikurinn hefst eins og áður segir kl. í dag. Hann verður einnig í beinni útsendingu, en ekkert jafnast á við að upplifa svona stórleik á staðnum. Nú er tækifærið til að sýna liðinu stuðning, skapa alvöru Eyjastemningu og hjálpa ÍBV að verja heimavöllinn í þessum risaeinvígi.