Sumarlestur bókasafnsins hófst formlega síðastliðinn laugardag með heimsókn Gunnars Helgasonar rithöfunds. Gunnar mætti og spjallaði við börn og fullorðna um starf sitt sem rithöfundur, ásamt því að kynna nýjustu bók sína sem er ekki enn komin með titil. Tilgangur sumarlestursins er fyrst og fremst að hvetja börn til að halda áfram að lesa yfir sumarmánuðina, efla þau og vekja áhuga þeirra enn frekar á lestri.

Opnað var fyrir skráningu síðstliðinn laugardag, en hægt er að skrá sig í allt sumar. Þema sumarlestursins í ár er nammiland og búið er að skreyta barnahornið á bókasafninu í takt við það.

Þeir krakkar sem skrá sig fá glæsilegan lestrarhest til að skrá lesturinn, en krakkar í 1.-4. bekk fengu einn slíkan sendan heim frá skólanum. Í lestrarhestinum leynist líka skemmtilegt spil fyrir alla fjölskylduna.

Hér fyrir neðan má sjá myndir frá deginum. Myndirnar eru frá Bókasafni Vestmannaeyja.