Eins og flestu Eyjafólki er kunnugt hefur sundlaugin í Vestmannaeyjum verið lokuð í nokkra mánuði vegna viðgerða sem hafa dregist á langinn. Af þeim sökum hafa grunnskólanemendur ekki getað stundað hefðbundið skólasund í vetur. Í stað hefðbundinnar kennslu hafa nemendur þurft að nýta vaðlaug utandyra, sem þykir ekki fullnægjandi lausn.

Til að bregðast við stöðunni hefur verið ákveðið að bjóða nemendum á yngsta stigi, 1.-4. bekk, upp á sundnámskeið í apríl. Tölvupóstur þess efnis var sendur til foreldra og forráðamanna barna á yngsta stigi í gær.

Nemendur munu fá að minnsta kosti sex skipti með sundþjálfara og fara tímarnir fram að loknum skóladegi.