- Eyjafréttir
- ·
- Áhugavert
- ·
Í upphafi árs fjölluðu Eyjafréttir um eignfærðan lögfræðikostnað Vestmannaeyjabæjar sem vakti spurningar í kjölfar fyrirspurna blaðamanns. Misræmi milli afhendra gagna og upplýsinga úr opnu bókhaldi bæjarins nam um 20 milljónum króna í lögfræðikostnaði. Sá kostnaður hafði ekki verið gjaldfærður heldur eignfærður í bókum bæjarins.
Síðar kom fram í samskiptum við bæinn að umræddur kostnaður tengdist undirbúningsvinnu vegna neysluvatnslagnar 4 og einnig vegna skemmda á vatnslögn 3.
Eyjafréttir ályktuðu í fyrri umfjöllun að kostnaðurinn kynni að tengjast deilu bæjarins við Vinnslustöðina um ábyrgð á skemmdum á vatnslögn 3, en um var að ræða umtalsverðan kostnað frá lögmannsstofunni Logos á árinu 2024.
Bærinn óskaði eftir leiðréttingu
Eftir birtingu fréttarinnar í janúar óskuðu bæjaryfirvöld eftir leiðréttingu. Ritstjórn Eyjafrétta taldi kröfuna óskýra og óskaði eftir frekari gögnum og rökstuðningi, meðal annars til að skýra á hvaða forsendum lögfræðikostnaður hefði verið eignfærður. Óskað var eftir afritum af öllum lögfræðireikningum á tímabilinu sem til umfjöllunar var.
44 dagar án gagna
Eyjafréttir óskuðu fyrst eftir gögnum þann 31. janúar síðastliðinn. Þrettán dögum síðar bárust svör þess efnis að beiðnin væri of umfangsmikil og að afmarka þyrfti hana.
Í kjölfarið var beiðnin afmörkuð, en tíu dagar liðu þar til svar barst. Ný beiðni var send viku síðar og 16. mars barst svar, tólf dögum síðar, sem reyndist ekki innihalda þau gögn sem óskað hafði verið eftir.
Málið hefur því verið til meðferðar hjá Vestmannaeyjabæ í um sex vikur án þess að umbeðin gögn hafi verið afhent.
Eyjafréttir hafa á undanförnum misserum átt í sambærilegum málum við stjórnvöld (ráðuneyti og bæjaryfirvöld) vegna aðgangs að upplýsingum og hefur úrskurðarnefnd um upplýsingamál í þeim tilvikum fallist á kröfur miðilsins.
Fleiri dæmi um eignfærslur
Eyjafréttir fjölluðu nýlega um drög að ársreikningi Vestmannaeyjabæjar þar sem fram kom að bærinn hafði tekjufært 208 milljóna króna bótagreiðslu frá tryggingafélagi vegna skemmda á vatnslögn. Þar sem bærinn hafði ekki lagt út sambærilega fjárhæð vegna framkvæmda myndaði tekjufærslan verulegan hagnað í bókum bæjarins.
Þá hafa bæjaryfirvöld einnig eignfært kostnað vegna hugmyndavinnu Ólafs Elíassonar vegna minnisvarða á Eldfelli. Sá kostnaður nam alls 100 milljónum króna, þar af 50 milljónum frá bænum og 50 milljónum frá ríkinu.
Slík meðferð kostnaðar vekur spurningar um hvaða viðmið liggja að baki eignfærslu og hvernig kostnaður er flokkaður í bókhaldi bæjarins.
Enn beðið eftir svörum
Þrátt fyrir ítrekaðar beiðnir og afmarkanir liggja umbeðin gögn enn ekki fyrir. Á meðan standa spurningar eftir um umfang og eðli lögfræðikostnaðar bæjarins og á hvaða forsendum hluti hans hefur verið færður sem eign í stað gjalda.
Eyjafréttir standa vaktina
Eyjafréttir hafa undanfarið unnið að því að greina fjárhag Vestmannaeyjabæjar, þar á meðal afkomu, stöðu hitaveitusjóðs og aðra lykilþætti í rekstri bæjarins.
Hver er staða hitaveitusjóðsins? – Eyjafréttir
Eignfærslur eru veigamikill þáttur í slíkri greiningu. Hvort kostnaður er gjaldfærður eða eignfærður getur haft veruleg áhrif á afkomu og stöðu sveitarfélagsins í bókhaldi.
Umfjöllun af þessu tagi krefst tíma og vinnu. Hún er unnin fyrir lesendur og áskrifendur Eyjafrétta.
Áskrift kostar frá 1.000 kr. á mánuði.
Með áskrift styður þú sjálfstæða og staðbundna blaðamennsku.
