Karlalið ÍBV tapaði síðasta leik sínum í Pepsídeildinni í ár en liðið lá fyrir Fjölni í Grafarvogi 3:0. Á sama tíma skoraði Gary Martin þrennu í sigri KR á �?ór í Vesturbænum og Martin náði því að nappa gullskónum af Jonathan Glenn, framherja ÍBV sem hefur verið efstur á markalistanum síðustu vikur en Glenn fór meiddur af velli í lok leiks. Sannarlega svekkjandi endir á tímabilinu en líklega í samræmi við sumarið í heild, frekar svekkjandi.

Fjölnismenn komust upp fyrir ÍBV í töflunni með sigrinum, skutust upp í 9. sæti og enduðu tímabilið með 23 stig. ÍBV endaði hins vegar í 10. sæti með 22 stig, aðeins einu stigi frá falli. Undanfarin ár hefur verið kallað eftir framherja sem átti að leysa allan vanda Eyjaliðsins. Nú er ÍBV hins vegar með næst markahæsta leikmann deildarinnar en árangurinn er langt fyrir neðan væntingar flestra í kringum liðið. Eitthvað verður því að endurskoða eitt og annað í kringum liðið, ekki bara innan vallar heldur líka utan vallar og er sú vinna reyndar hafin.