Þau tímamót urðu í vikunni að byggingarkrani sem staðið hefur á athafnasvæði Vinnslustöðvarinnar var tekinn niður eftir tæplega tveggja ára framkvæmdir.  Byggingin er um 5.600 fermetrar sem í verður saltfiskvinnsla á neðri hæð og innvigtun uppsjávarafla á efri hæð. Þetta kemur fram í frétt á vefsíðu Vinnslustöðvarinnar.

Ýmsar áskoranir

Bragi Freyr Bragason er verkefnastjóri hjá Eykt sem sér um byggingu hússins. Bragi hefur verið yfir verkinu síðan í september sl..

Spurður um hvað hafi verið sérstakt við að nýta gamla þróarrýmið við uppbygginguna segir hann að nýta þróarrýmið hafi verið fyrst og fremst hugsað með það fyrir augum að minnka kostnað og framkvæmdatíma með það fyrir augum að nýta það sem hægt var að nýta, en að því sögðu þá koma oft önnur atriði upp sem geta aukið flækjustig á framkvæmdinni.

Hvaða áskoranir komu upp við að samþætta nýja og gamla byggingahluta?

Það hafa verið ýmsar áskoranir sem komið hafa upp, þar sem framkvæmdin er inniklemmd á svo að segja alla kanta þar sem starfsemi er í gangi að stórum hluta allan framkvæmda tímann, bræðslan er sunnan við nýbygginguna og liggja röralagnir þangað í gegnum nýbygginguna, utan á henni og þétt upp við hana í jarðvegi. Þetta hefur þurft að taka tillit til á framkvæmdatíma og leysa allan tímann. Einnig hafa verið ýmsar skekkjur í málum á gömlum aðliggjandi byggingum og þró sem erfitt var að fanga upp við upphaf framkvæmda.

Heitt vatn af skornum skammti

Að sögn Braga hefur framkvæmdin engu að síður gengið vel. „Við fengum reyndar leiðinda veður kafla í janúar og febrúar sem hafði smá áhrif.”

Hann segir aðspurður að það hafi komið nokkuð á óvart hversu aðgangur að heitu vatni virðist vera af skornum skammti hér í Eyjum. „Það hafði áhrif á vetrar steypuvinnu, þar sem nokkrar mínus gráður stoppuðu steypuvinnu þar sem erfitt var þá t.d. að þrífa tæki.”

Hvernig gekk að vinna í Vestmannaeyjum, með tilliti til aðstæðna, flutnings á efni og mannafla?

Það gekk vel að mestu leyti. Það voru ekki margir dagar sem það var stopp þar sem ekki var hægt að nota byggingarkrana vegna vinds, efnis aðföng voru skipulögð með það í huga að flutningur til Eyja tæki aðeins lengri tíma, en kom á óvart hversu vel það gekk.

Spurður hvort hann vilji bæta einhverju við segir Bragi Freyr að það sé kannski helst sem aðkomumanni hér í Eyjum, hversu mikill velvilji það sé hjá „lokalnum„ að bregðast við beiðnum og leysa málin.

Höfum átt mjög gott samstarf við Eykt

Willum Andersen, tæknilegur rekstrarstjóri hjá Vinnslustöðinni segir í samtali við Vinnslustöðvarvefinn að þau hafi átt mjög gott samstarf við Eykt. Hann segir verkefnið hafa tekið einhverjum breytingum á byggingartímanum og hafa þau verið leyst af mikilli fagmennsku.

„Eins og Bragi segir að með því að nýta gamla veggi erum við að endurnýta það sem hægt er og minnka sóun og kolefnisspor. Það þýðir hins vegar að flækjustigið verður talsvert meira því menn hafa kannski ekki verið að spá í því er þessir veggir voru steyptir á sínum tima að allt væri hornrétt, en styrkurinn í þessum veggjum er meiri heldur en ef við hefðum byggt nýja. Þeir voru byggðir á sínum tíma til að standast rosalegt álag frá aflanum sem var settur í þrærnar.

Kostnaðaráætlun sem Eykt gerði á sínum tíma hefur staðist nokkurn veginn og má að hluta þakka að í góðu samstarfi er hægt leita hagkvæmustu lausna. Hópurinn sem hefur verið hérna hjá okkur og búið í vinnubúðunum hefur alveg verið til fyrirmyndar og ekki hafa komið upp nein vandamál sem teljandi er,” segir Willum að lokum.

Áætluð verklok á húsinu verða í stórum dráttum nú á sumarmánuðum, en ýmiskonar innanhússbúnaður kemur síðar, segir í umfjölluninni.