Vegagerðin og Strandferðaskip í Færeyjum hafa átt í viðræðum um hvort mögulegt sé að samnýta Herjólf III með einhverjum hætti. Grunnforsenda samninga er að Herjólfur III sé aðgengilegur ef og þegar þörf reynist á og  verði þannig áfram varaferja fyrir nýja Herjólf. Reikna má með að niðurstaða fáist í viðræðurnar á næstu mánuðum.

Strandfaraskip í Færeyjum, sem er rekstraraðili almenningssamgagna þar í landi, hefur sýnt áhuga á því að taka Herjólf III í sína þjónustu. Skipið er hugsað uppbótarskip vegna mikilla anna á ýmsum siglingarleiðum í Færeyjum. Skipið verður fullmannað og í reglubundinni notkun en ekki fast í áætlanasiglinum.  Það þýðir að skipinu verður viðhaldið og áhöfn er til staðar og ferjan þá einungis í um sólarhrings fjarlægð frá Íslandi.

Eitt helsta verkefni Vegagerðarinnar er að tryggja öruggar samgöngur á skynsaman og hagkvæman hátt. Vestmannaeyjar eru háðir ferjusiglingum og hluti af því að búa við slíkar samgöngur er að geta reitt sig á varaleið þegar Herjólfur þarf að fara í reglubundið viðhald og ekki síður ef eitthvað óvænt kemur upp.

Eftir að nýi Herjólfur komst í fullan rekstur og reynslan hefur sýnt okkur að hann stenst allar væntingar um þjónustustig fyrir flutninga á fólki og farmi milli lands og eyja, hefur hlutverk Herjólfs III verið í talsverðri óvissu. Að liggja verkefnalaust við bryggju fer illa með skip og rekstur og viðhald við þær aðstæður mjög kostnaðarsamt.

Hugmyndir voru viðraðar um að Herjólfur III gæti siglt á milli Stykkishólms og Brjánslækjar en eftir ítarlega skoðun á því verkefni varð niðurstaðan sú að miðað við núverandi aðstæður (hafnarmannvirkin) hentar Herjólfur III engan veginn á þá siglingaleið.

Það er því áhugavert að sjá hvort samnýta megi skipið bæði í Færeyjum og á Íslandi.