Nýverið var greint frá því að minnisvarði í tilefni 50 ára gosloka í Vestmannaeyjum hafi enn ekki risið, en í ár eru 51 ár liðin frá eldsumbrotunum á Heimaey.
Fram kom á fundi bæjarráðs Vestmannaeyja í síðustu viku að málið hafi dregist og sé á byrjunarstigi. Á það eftir að fara í gegnum skipulagsferli áður en endanlegar ákvarðanir verða teknar.
Fyrir ráðinu lágu drög að samningi milli menningar- og viðskiptaráðuneytis og Vestmannaeyjabæjar um verkefnastyrk til gerðar göngustígs yfir hraun að minnisvarða um eldgosið í Heimaey 1973. Þá lágu einnig fyrir ráðinu drög að viljayfirlýsingu á milli sömu aðila vegna framkvæmda við gerð umrædds göngustígs í samvinnu við forsætisráðuneytið.
Varði eina dýrmætustu og yngstu náttúruperlu og söguheimild Vestmannaeyja
Á fundi bæjarstjórnar á fimmtudaginn sl. var lögð fram tillaga frá bæjarfulltrúum Sjálfstæðisflokksins þar sem segir að í ljósi verulegra tafa á framkvæmd og afhendingu minnisvarða í tilefni hálfrar aldar afmælis Heimaeyjargossins sem nú er liðið, yfirvofandi óafturkræfs inngrips í dýrmæta náttúru Vestmannaeyja og fyrirsjáanlegs vaxandi framkvæmdakostnaðar leggja fulltrúar Sjálfstæðisflokksins til að staldrað verði við.
Ekki liggur fyrir kostnaðargreining á afmörkuðum hlutum verkefnisins auk þess sem hluti listaverksins er göngustígagerð í Eldfelli þar sem ekki liggur fyrir ásýnd, né hve umfangsmikil framkvæmdin er.
Áður en lengra er haldið er nauðsynlegt að það liggi fyrir ítarlegri kynning á verkefninu, stöðu þess, kostnaðarmat og svo framvegis.
Í framhaldi af þeirri kynningu er lagt til að málið verði sett í íbúakosningu enda varðar málefnið eina dýrmætustu og yngstu náttúruperlu og söguheimild Vestmannaeyja, segir í tillögu minnihlutans.
Málinu vísað til bæjarráðs
Í framhaldi lagði Páll Magnússon, forseti bæjarstjórnar fram tillögu þar sem lagt var til að framkominni tillögu bæjarfulltrúa Sjálfstæðisflokksns, um minnisvarða í tilefni af 50 ára goslokaafmælis, verði vísað til bæjarráðs til frekari umfjöllunar. Eftir fundarhlé var tillaga forseta bæjarstjórnar samþykkt með 9 samhljóða atkvæðum.
Hildur Sólveig Sigurðardóttir gerði grein fyrir atkvæði sínu og las upp sameiginlega bókun bæjarfulltrúa D lista þar sem segir að undirrituð samþykki að vísa málinu til bæjarráðs en leggja áfram áherslu á að verði málinu framhaldið verði það sett í íbúakosningu.
https://eyjar.net/malid-a-byrjunarstigi/
