Umsóknir um strandveiðileyfi fyrir vertíðina 2023 eru nú í fyrsta skipti afgreidd í gegnum stafrænt umsóknakerfi Ísland.is.

Með þessari breytingu er þjónusta við strandveiðisjómenn bætt til muna þar sem kerfið er notendavænt sjálfsafgreiðslukerfi og leyfi afgreitt samstundis ef öll skilyrði eru uppfyllt. Áður gat tekið allt að tvo daga að fá útgefið leyfi og voru þau gefin út handvirkt og útgáfa háð opnunartíma stofnunarinnar.

Með breyttri og einfaldari framkvæmd leggur Fiskistofa mikla áherslu á að gögn varðandi eignarhald skips og útgerðar séu fullnægjandi og hefur útgáfa einhverra leyfa tafist vegna gagnaöflunar. Heilt yfir hefur þó afgreiðsla umsókna gengið mjög vel og án teljandi vandkvæða.