Það var frekar rólegt hjá lögreglunni í vikunni sem leið. Samt sem áður hafði lögreglan í ýmsu að snúast við að aðstoða borgarana við hin ýmsu tilvik sem upp komu.

Ein eignaspjöll voru kærð til lögreglunnar í vikunni sem leið en um er að ræða skemmdir á bifreið sem stóð við Brimhólabraut 34.  Bifreiðinni hafði verið lagt við húsið þann 6. desember sl. á milli kl. 18:30 og 21:00 en á meðan höfðu einhverjir eða einhver brotið hliðarspegil hægra megin á bifreiðinni.  Þeir sem einhverjar upplýsingar hafa um hver eða hverjir þarna voru að verki eru vinsamlegast beðnir um að hafa samband við lögreglu.

Tvö umferðaróhöpp voru tilkynnt til lögreglu í vikunni en í báðum tilvikum var um minniháttar óhöpp að ræða og engin slys á fólki. Bæði þessi óhöpp eru rakin til hálku.

Einn ökumaður var sektaður vegna brota á umferðarlögum en hann hafði lagt öfugt miðað við akstursstefnu á Heiðarvegi. 

Þá voru um 30 eigendur ökutækja boðaðir til skoðunar með ökutæki sín.