Efnistaka við Landeyjahöfn er nú í skipulagsferli. Fyrirtækið HeidelbergCement Pozzolanic Materials ehf. (HPM) skilaði matsáætlun til Skipulagsstofnunar þann 22. desember sl. vegna efnistöku úr sjó við Landeyjahöfn.
Allt að 65-80 milljónir rúmmetrar af efni
Fyrirhugað er að vinna allt að 65-80 milljónir rúmmetra af efni á efnistökusvæðinu og áætlað að það taki um 30 ár, miðað við að árleg efnistaka sé allt að 2 milljónir rúmmetra.
Skipulagsstofnun leitaði umsagna við matsáætluninni m.a. frá Vestmannaeyjabæ sem skilaði inn ítarlegri og greinargóðri umsögn um málið þar sem m.a. er farið yfir áhyggjur af lífríki, innviðum á hafsbotni og siglingum Herjólfs.
Skipulagsstofnun sendi síðan umsagnarbeiðni til Vestmannaeyjabæjar þann 3. apríl sl. er varðar umhverfismatsskýslu sem COWI vann fyrir hönd HPM. Skilafrestur á umsögn er til 16. maí nk.
Mikilvægt svæði fyrir sveitarfélagið
Bæjarráð Vestmannaeyja ítrekar áhyggjur sínar af þessu verkefni sérstaklega þar sem um er að ræða mikilvægt svæði fyrir sveitarfélagið er lýtur að siglingum um höfnina, hrygningarsvæði fiska og innviðum á hafsbotni. Reynslan af Landeyjahöfn og sandmokstri þar hefur sýnt að þrátt fyrir bestu áætlanir er ekki hægt að sjá fyrir hvernig til muni takast við efnistöku svo tryggt verði að hún hafi ekki áhrif til hins verra á Landeyjahöfn og ekki verði tjón á mikilvægum innviðum Eyjamanna. Vestmannaeyjabær mun senda umsögn um málið í skipulagsgátt Skipulagsstofnunar. Jafnframt mun Vestmannaeyjabær óska eftir því að fylgja umsögninni eftir með fundi.
