Skilgreinum okkur út frá þessum mikla atburði

„Það er mér mikil ánægja, fyrir hönd Vestmannaeyjabæjar að heiðra Ingiberg Óskarsson nákvæmlega á þessum degi. Því í dag minnumst við þess að rétt 52 ár eru nú liðin frá því eldgos braust út á Heimaey. Það er því ómetanlegt afrek hjá Ingibergi að leggja svo mikinn metnað í að freista þess að safna saman og skrásetja yfirlit yfir alla þá tæplega 5000 Eyjamenn sem yfirgáfu Vestmannaeyjar nóttina örlagaríku,“ sagði Íris bæjarstjóri við athöfn 23. janúar í Eldheimum þar sem Ingibergur Óskarsson var heiðraður fyrir framtakið 1973 – Allir í bátana og bætti við að fyrir þetta afrek Ingibergs stöndum við öll Vestmannaeyingar í mikilli þakkarskuld.

Íris sagði að vænst þætti henni um allar hinar ólíku frásagnir sem Ingibergur hefur náð að safna saman. Hver og einasti sem flýði Eyjar þessa örlagaríku nótt ætti sína sérstöku frásögn sem megi ekki gleymast. „Jafnvel þau okkar sem voru of lítil til að muna atburðina sjálfa eigum minningar sem aðrir hafa sagt okkur. Frásagnir fjölskyldunnar eru orðnar lifandi veruleiki í lífi okkar og oft erfitt að greina í sundur það sem aðrir sögðu og hitt sem maður upplifði sjálfur,“ sagði Íris sem var eins árs í gosinu og mamma hennar komin sjö mánuði á leið. Fjölskyldan fór upp á land og sneri aftur.

Þakka öllum sem komu að verki

„Um leið og Vestmannaeyjabær þakkar Ingibergi þetta stóra framtak er ástæða til að þakka einnig öllum sem koma að því að setja efnið upp með þeim hætti að það nái til sem allra flestra með nútímatækni. Eins og við sáum verða gögnin aðgengileg á Heimaslóð en þau verða jafnframt varðveitt í Safnahúsinu sem þarf að halda verkefninu áfram eins og hægt er með aðstoð og undir forystu Ingibergs, Ómars, Frosta og annarra. Ingibergur hefur unnið ótrúlegt starf, enn er hægt að finna aðeins meira, draga fram fleiri frásagnir og draga fram aðrar myndir sem segja söguna með breyttum blæ eða annarri framvindu.

Við skilgreinum okkur sjálf sem Vestmannaeyinga út frá þessum mikla atburði. Samstaða og samkennd sem einkennir okkar samfélag sér í lagi þegar áfall verða, tengist sjálfsagt þessari erfiðu reynslu fyrir 52 árum. Fyrir okkur er þessi dagur lifandi veruleiki og verður ávallt. Einmitt þess vegna þarf og verður að gera hvorutveggja í senn: Að gera ávallt aðgengilegar eins og frekast er kostur öll þessi ómetanlegu verðmæti sem tekist hefur að ná í sem og að halda áfram meðan enn er nokkur von um frekari heimildir. Ingibergur byrjaði verk sitt fyrir meira en áratug og því gat hann náð í margt það sem horfið er núna. Það má aðeins velta fyrir sér ef hann hefði ekki lagt í þetta mikla starf, hversu fátækari við Vestmannaeyingar?

Íris sagði seigluna og ástríðuna fyrir heimkynnunum reyndust sterkari en heilt eldgos í bakgarðinum og smám saman byggðist aftur upp það einstaka samfélag sem við þekkjum og eigum í dag. „Fyrir það er þakkað sem og fyrir þá vinnu sem Ingibergur Óskarsson hefur lagt á sig til að varðveita og miðla áfram minningum sem aldrei mega gleymast,“ sagði Íris.