Kolbrún Inga Stefánsdóttir eða Kolla eins og hún er oftast kölluð er 34 ára, fædd á Akureyri en uppalin í Vestmannaeyjum. Hún á einn son, Atlas Neo, sem er átta ára gamall. Kolla er dóttir Svövu Gunnarsdóttur og Stefáns Birgissonar. Líf Kollu hefur verið mikið ævintýri á síðastliðnum árum, en hún hefur búið og ferðast til fjölmargra landa. Hún flutti fyrst erlendis aðeins 19 ára gömul og hefur síðan þá meira og minna búið úti.

Ferðalag Kollu hófst þegar hún flutti til Kína árið 2009, þar sem Biggi bróðir hennar býr, en hann var hennar hægri hönd á þeim tíma segir hún. Þaðan lá leið hennar til Taílands, og síðan í nám til Shanghai árið 2015 ásamt barnsföður sínum. Fljótlega eftir það kemst Kolla að því að hún sé ólétt og var hún afar glöð með það en var á sama tíma hrædd um að draumurinn um ferðalög væri farinn út um gluggann. En það reyndist alls ekki raunin þegar uppi var staðið. Hún fékk í raun besta ferðafélaga í heimi í fangið segir hún. Þau skírðu strákinn Atlas og var hún var staðráðin í að ferðast með hann um allan heim, sem að hún svo gerði. ,,Fyrstu 3 árin hans Atlasar ferðuðumst/bjuggum við í 19 löndum og fluttum síðan til Marbella á Spáni þar sem við búum núna. Maður getur allt sem maður ætlar sér og þó að maður eignist barn þá er það bara enn þá meira ævintýri.“ Segir Kolla.

Frá Eyjum út í hinn stóra heim

Að flytja frá litla samfélaginu í Vestmannaeyjum út í hinn stóra heim hefur kennt Kollu margt. Á þessum tíma hefur Kolla kynnst ólíkum menningarheimum og lært ný tungumál sem hún segir skemmtilegt en krefjandi á sama tíma. Það sem hafi komið henni mest á óvart við að búa erlendis sé hversu mikil forréttindi það séu að fæðast á Íslandi. „Það að hafa hita, rafmagn og þak yfir höfuðið er ekki sjálfsagt. Í Asíu sá ég heilu fjölskyldurnar búa saman í litlum húsum án salernis og þá lærði ég að þakka fyrir það sem ég áður tók sem sjálfsögðum hlut.“

Kolla segist einnig finna mun á því að ala upp barn erlendis miðað við það sem hún þekkti sjálf sem barn. „Ég er alin upp við að leika úti frá morgni til kvölds og koma heim þegar það var byrjað að dimma, en þegar maður er með barn í útlöndum þá tekur maður ekki augun af þeim í eina mínútu.“

Að heimsækja Vestmannaeyjar, hefur alltaf verið henni mikilvægt og saknar hún fjölskyldunnar mest af öllu. Hún kemur yfirleitt 1–2 sinnum á ári og nýtir sumartímann til að vera með sínum nánustu. „Þeir sem þekkja mig vita að ég elska ekkert meira en að vera í faðmi fjölskyldunnar,“ segir hún og bætir við að henni hlakki mikið til að koma „heim“ í sumar. Það fyrsta sem hún ætli að gera þegar hún kemur til Eyja sé að hitta fjölskyldu og vini, fara í sund og fjallgöngu ásamt því að njóta góðra máltíða. ,,Við erum ótrúlega heppinn með frábæra matsölustaði í Vestmannaeyjum en ekkert toppar matinn hjá mömmu og pabba.“

Heilsan í fyrsta sæti  

Í dag starfar Kolla sem einkaþjálfari og jógakennari. Hennar fókus síðastliðin ár hefur verið á andlega og líkamlega heilsu. Kolla vinnur einnig á meðferðarheimilum þar sem hún þjálfar og kennir hugleiðslu. En hún fer einnig heim til fólks og þjálfar það.

„Mig langar að minna fólk á að við eigum öll 1000 drauma , en ef maður missir heilsuna þá á maður aðeins einn draum: að fá heilsuna til baka.“

Þó Kolla sjái ekki fyrir sér að flytja aftur heim til Íslands strax, þá útilokar hún það ekki. „Ef ég myndi flytja heim, þá væru Vestmannaeyjar alltaf fyrsta val.“

Kolla heldur úti áhugaverðrum Instagram reikningi (healthbykolla) fyrir þá sem vilja fylgjast með henni. Þar sameinar hún áhugamál sín um þjálfun, heilsu og ferðalög. Kolla er frábær fyrirmynd sem sýnir að það er vel hægt að fylgja draumum sínum þó maður eigi barn/börn.