Landsréttur hefur staðfest úrskurð Héraðsdóms Suðurlands um að hafna kröfu lögreglustjórans á Suðurlandi um gæsluvarðhald yfir tveimur einstaklingum í tengslum við rannsókn á andláti á hjúkrunarheimilinu Hraunbúðum í Vestmannaeyjum. Lögreglustjóri kærði úrskurðinn til Landsréttar sem hefur nú komist að þeirri niðurstöðu að skilyrði gæsluvarðhalds séu ekki lengur fyrir hendi.

Þetta kemur fram í tilkynningu frá lögreglunni á Suðurlandi. Þar segir að skýrslutökur og aðrar rannsóknaraðgerðir hafi farið fram undanfarna daga og með hliðsjón af framvindu rannsóknarinnar telji Landsréttur að rannsóknarhagsmunir réttlæti ekki gæsluvarðhald í málinu.

Tilkynning í heild sinni:

Héraðsdómur Suðurlands hafnaði á þriðjudag kröfu lögreglustjórans á Suðurlandi um gæsluvarðhald til föstudags vegna máls er varðar andlát í Vestmannaeyjum. Lögreglustjóri kærði úrskurð héraðsdóms til Landsréttar. Skýrslutökur og rannsóknaraðgerðir hafa farið fram undanfarna daga og niðurstaða Landsréttar í dag er á þá leið að m.a. með tilliti til þess séu ekki lengur fyrir hendi rannsóknarhagsmunir sem styðja gæsluvarðhald.