Karl Gauti Hjaltason, þingmaður Miðflokksins í Suðurkjördæmi og fyrrverandi sýslumaður í Vestmannaeyjum, mun leiða lista Miðflokksins í Suðvesturkjördæmi fyrir komandi kosningar í september.
Eyjafréttir greindu frá því nýverið að ekki hafi verið að finna nafn Karls Gauta á lista flokksins í Suðurkjördæmi sem kynntur var nýverið. En Karl Gauti var upprunalega frambjóðandi Flokksins Fólksins í því kjördæmi í kosningunum 2017 og settist á þing fyrir þann flokk.
Framboðslisti Miðflokksins var samþykktur með 83% greiddra atkvæða á félagsfundi kjördæmisins fyrr í dag.
Eins og fyrr segir mun Karl Gauti Hjaltason, þingmaður Miðflokksins, leiða listann. Í öðru sæti er Nanna Margrét Gunnlaugsdóttir og í þriðja sæti er Brynjólfur Þorkell Brynjólfsson.
