Einstæð sýning mynda eftir Sigurjón Ólafsson myndhöggvara var opnuð núna um helgina í listasafninu sem við hann er kennt á Laugarnestanga í Reykjavík. Þarna er sýnt opinberlega í fyrsta sinn fjölskylduverkefni sem Sigurjón tók að sér árið 1963 fyrir Einar Sigurðsson útgerðarmann.

Sýndar eru alls 17 myndir af Einari ríka sjálfum, af Svövu Ágústsdóttur, síðari eiginkonu hans, tíu börnum þeirra og föður Einars, Sigurði Sigurfinnssyni útvegsbónda og einum af frumkvöðlum vélbátaútgerðar í Vestmannaeyjum.

Af börnunum eru vangamyndir á vegg en af hinum fullorðnu eru brjóstmyndir, sitjandi myndir eða standandi myndir. Sýningin nefnist Barnalán og sú mynd sem hefur trúlega hvxað mest áhrif á sýningargesti nefnist Barnakarlinn.  Sú sýnir Einar sitjandi með Auði dóttur sína í fanginu 1964.

Aðalsteinn Ingólfsson listfræðingur telur að fjölskyldusafnið eigi sér varla hliðstæðu í allri veröldinni. Dæmi eru vissulega um það erlendis að málarar hafi verið fengnir til að mála á striga myndir af heilum fjölskyldum en hér erum við að tala um skúlptúra af Einari ríka og fólkinu hans!

Sýningin Barnalán verður Listasafni Sigurjóns Ólafssonar til 27. ágúst. Það er opið laugardaga og sunnudaga frá kl. 13 til 17 i vetur en alla daga að mánudögum undanskildum í sumar, kl. 13-17.

• Við fjöllum frekar um þessa afar athyglisverðu listsýningu í Eyjafréttum sem út koma 16. febrúar og tökum hús á kjarnakonunni Birgittu Spur, ekkju Sigurjóns Ólafssonar, heima á Laugarnestanga. Hún rifjar meðal annars upp samskipti Sigurjóns og Einars ríka og vinnu listamannsins fyrir útgerðarmanninn í Eyjum.

Mynd:

Sýningin á efri hæð Sigurjónssafns.