Elís Þór Aðalsteinsson, leikmaður ÍBV í handbolta, var kallaður inn á æfingu A-landsliðs karla í handbolta, sem fór fram í Safamýrinni fyrr í dag. 

Elís var meðal sex ungra og efnilegra leikmanna sem Snorri Steinn Gunnarsson kallaði til æfingarinnar. Hinir fimm voru Jökull Blöndal Björnsson og Patrekur Smári Arnarsson, leikmenn ÍR, Ingvar Dagur Gunnarsson, leikmaður FH, Daníel Montoro, leikmaður Vals og Dagur Gautason, leikmaður KA. 

Ástæða þess var meðal annars sú að hluti landsliðshópsins var að keppa með sínum félagsliðum í gær og náðu ekki að komast í tæka tíð fyrir æfinguna. 

Elís Þór er hluti af æfingahóp u-20 ára landsliðsins ásamt Andra Erlingssyni, einnig úr röðum ÍBV.

Íslenska landsliðið mun mæta Svíþjóð í tveimur vináttuleikjum á Hlíðarenda og í Kaplakrika. Fyrri leikurinn fer fram á fimmtudagskvöldið og seinni á laugardag.