Hafrannsóknastofnun birti í morgun ráðgjöf fyrir komandi fiskveiðiár 2025/2026. Enn er lagt til að dregið verði saman í ráðlögðum þorskafla. Í samræmi við aflareglu stjórnvalda er lagt til að hámarksafli þorsks á næsta fiskveiðiári verði alls 203.822 tonn, en á yfirstandandi fiskveiðiári er hann tæplega 213.214 tonn. Samdrátturinn á milli fiskveiðiára er því um 4,4%. Gróflega má því áætla að þessi samdráttur kosti þjóðarbúið um 6-7 milljarða króna í útflutningstekjur af þorski. Ráðlagður heildarafli í þorski hefur ekki verið minni frá fiskveiðiárinu 2012/2013 og er 25% lægri en á fiskveiðiárinu 2019/2020 þegar heildaraflinn hljóðaði upp á 272.411 tonn. Slíkur samdráttur á ekki lengri tíma er áskorun og hefur mikil áhrif á afkomu greinarinnar, segir í yfirlýsingu SFS vegna ráðgjafar Hafrannsóknastofnunar sem kynnt var fyrr í dag.

Góðu tíðindin eru 27% hækkun í ráðgjöf sumargotssíldar vegna stærri viðmiðunarstofns. Aflamark ýsu verður 78.918 tonn sem er tæplega 3% hækkun á ráðgjöf frá yfirstandandi fiskveiðiári. Ráðgjöf fyrir ufsa lækkar um 11 % frá yfirstandandi fiskveiðiári, niður í 59.510 tonn. Ráðgjöf fyrir gullkarfa lækkar um 12% og er 41.911 tonn. Áfram er lagt til að aflamark djúpkarfa verði 0 tonn þar sem hrygningarstofninn er metinn undir varúðarmörkum.

Náttúruleg óvissa sem fylgir nýtingu á náttúruauðlindum er viðvarandi í fiskveiðum. Nærtækast er að nefna ítrekaðan loðnubrest. Þá hefur pólitísk óvissa í kringum greinina ekki verið meiri í rúman áratug. Bæði hvað varðar boðaða ríflega tvöföldun á veiðigjaldi og ámælisverðar hugmyndir um auknar heimildir til strandveiða. Bæði þessi atriði eru til þess fallin að mola undan íslenska kerfinu til stjórnar á fiskveiðum. Það kerfi tók áratugi að byggja upp og hefur gert íslenskan sjávarútveg að fyrirmynd og einn þann hagkvæmasta í heimi.

Að mati samtakanna er ekki annað ráðlegt en að fylgja leiðbeiningum vísindamanna. Auk þess er rétt að undirstrika það rækilega að alþjóðlegar vottanir, sem gera íslenskum fyrirtækjum kleift að selja afurðir um allan heim, byggjast á því að veiðar séu sjálfbærar og í samræmi við vísindalega ráðgjöf.

Enn og aftur skulu stjórnvöld hvött til þess að tryggja að hér við land fari fram öflugar og vandaðar hafrannsóknir. Nýting á fiskistofnum líður fyrir það að rannsóknum hefur ekki verið sinnt með fullnægjandi hætti. Í ljósi ráðlegginga Hafró eru stjórnvöld brýnd til þess að standa vörð um samkeppnishæfni íslensks sjávarútvegs á alþjóðlegum vettvangi og hefja samtal við hagaðila um hvernig hægt sé að auka tekjur samfélagsins af sjávarauðlindinni.