Ungmennaráð Vestmannaeyja var til umfjöllunar á fundi fjölskyldu- og tómstundarráðs í liðinni viku.

Ráðð ræddi nauðsyn þess að endurvekja ungmennaráð og mikilvægi virkrar þátttöku ungmenna í aðkomu að lýðræðislegri þátttöku og áhrifum á stjórnun sveitarfélagsins. Erfiðlega hefur gengið að finna einstaklinga í ráðið, að því er fram kemur í fundargerð fjölskyldu- og tómstundarráðs.

Ráðið ítrekar mikilvægi þess að í Vestmannaeyjum verði starfrækt ungmennaráð. Það er mikilvægt fyrir sveitarfélagið okkar að rödd ungmenna heyrist og að þau séu virkir þátttakendur í samfélaginu. Ráðið telur eðlilegt að einstaklingar sem sitja í ráðinu fái greitt fyrir þá vinnu.

Ráðið fól framkvæmdastjóra fjölskyldu og fræðslusviðs að skoða laun annarra sveitarfélaga fyrir ungmenni sem sitja í ungmennaráði sem og að útbúa auglýsingu til að auglýsa eftir þátttakendum í ungmennaráð. Ráðið bindur vonir við að sú aðferð skili sér betur en að leita fólk uppi til að sitja í ungmennaráði. Ráðið mun taka málið upp aftur þegar þessari vinnu er lokið.