Foreldrar Elliða stolt á leið til Danmerkur
Elliði Snær Viðarsson í leik með landsliðinu. Mynd/HSÍ

Ritstjórn

frettir@eyjafrettir.is

Elliði Snær Viðarsson hefur verið magnaður með íslenska landsliðinu á Evrópumótinu í handbolta. Elliði hefur tvisvar sinnum verið markahæstur í liði Íslands á þessu móti og var í leiknum mikilvæga gegn Slóvenum valinn maður leiksins. 

Eins og flestir Eyjamenn vita eru foreldrar Elliða, Dóra Björk Gunnarsdóttir og Viðar Einarsson. Þegar við settum okkur í samband við þau sátu þau um borð í Herjólfi. Ferðinni er heitið til Danmerkur til að fylgjast með syninum og íslenska liðinu leika í undanúrslitum gegn heimamönnum, Dönum.

Aðspurð að því hvernig það væri að fylgjast með syninum spila fyrir Íslands hönd á stórmóti segir Dóra ,,Það er alltaf ótrúlega skemmtilegt, pínu taugatrekkjandi en mjög gefandi. Við erum ótrúlega stolt af honum. Það er mikil vinna og fórnfýsi sem strákarnir leggja á sig til að spila fyrir Íslands hönd. Það hefur verið gaman að fylgjast með þeim styrkjast með hverju mótinu.”

Njóta þess að komast á stóra sviðið og halda í gleðina

Það getur tekið á taugarnar að fylgjast með strákunum en þau segjast enn vera uppistandandi en segja þetta taka á. „Sérstaklega þegar maður er langt í burtu, það er stundum erfitt. En þegar árangurinn er góður þá er gleðin líka mikil.”

Eins og fram hefur komið hefur Elliði verið markahæsti leikmaður Íslands í tveimur leikjum á mótinu, fyrst gegn Sviss með átta mörk og síðar gegn Slóvenum, með átta mörk. Dóra segir að þessi markaskorun Elliða sé alls ekki að koma á óvart. ,,Elliði hefur átt gott tímabil í þýsku deildinni og verið grimmur í markaskorun, þannig hann kemur okkur ekki á óvart. Hann hefur sloppið við meiðsli í vetur og kom að okkar mati vel stemmdur inn í mótið”.

Síðustu dagar hafa verið mikil rússíbanareið og afar stutt á milli leikja. Spurð hvort þau hafi átt von á þessum viðsnúningi eftir jafnteflið gegn Sviss segir hún að þau eins og nær öll þjóðin hafi haldið að EM ævintýrið væri á enda eftir leikinn gegn Sviss. „Þriðjudagurinn var mikil rússíbanareið sem gerir þetta ævintýri enn meira sjarmerandi. Nú er bara að njóta þess að komast á stóra sviðið og halda í gleðina.” Að lokum segja þau ,,Áfram Ísland”.

Nýjustu fréttir

Aðsend grein
Þetta er mjög einfalt og enginn ómöguleiki
Menning
 Ég skal syngja fyrir þig í Salnum
Íþróttir
Hinrik Hugi framlengir við ÍBV
Íþróttir
Díana Dögg öflug í sigri Blomberg-Lippe
Myndband
Snjóþungt í Eyjum
Áhugavert
Skvísudagur á Bókasafninu um helgina
Vinnslustöðin
Fleiri erlendir starfsmenn læra íslensku í Eyjum
Aðsent
Taktu þátt í að móta menningarstefnu Vestmannaeyja
Mest lesið

Góð ráð fyrir siglingu

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

  • Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.
  • Forðist áfenga drykki daginn fyrir brottför
  • Forðist djúpsteiktan, brasaðan eða saltan mat daginn fyrir siglingu.
  • Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.
  • Forðist mikið koffein. Mikið kaffi er ekki það sem maganum líkar fyrir sjóferð.
  • Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.
  • Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

  • Koffínátín – fæst án lyfseðils
  • Postafen – fæst án lyfseðils
  • Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

  • Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.
  • Piparminta og te eru einnig gömul húsráð við ferðaveiki.
  • Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

  • Minna finnst fyrir hreyfingu og veltingi ef maður er staddur næst miðju bátsins.
  • Mörgum finnst gott að vera í kulda, t.d.að vera úti á dekki og láta vindinn leika um sig.
  • Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Eyjafréttir
Keyrt af  GDPR Cookie Compliance
Friðhelgisyfirlýsing

Þessi vefsíða notar fótspor til að við getum veitt þér bestu notendaupplifun. Upplýsingar um fótspor eru geymdar í vafranum þínum og framkvæma aðgerðir eins og að þekkja þig þegar þú kemur aftur á vefsíðu okkar og hjálpa teymi okkar að skilja hvaða hluta vefsíðunnar þér finnst áhugaverðast og gagnlegast.