Í dag funda fulltrúar Útvegsbændafélags Vestmannaeyja, Vestmannaeyjabæjar, Sjómannafélagsins Jötuns og stéttarfélagsins Drífanda með þingmönnum Suðurkjördæmis til að koma á framfæri þeim alvarlegu áhyggjum sem uppi eru vegna fyrirhugaðrar hækkunar veiðigjalda.

Að sögn Sindra Viðarssonar hjá Útvegsbændafélaginu telja fulltrúar félagana sem boða til fundarins mikilvægt að stjórnvöld geri sér grein fyrir þeim víðtæku áhrifum sem fyrirhuguð hækkun muni hafa, ekki einungis á fyrirtæki í sjávarútvegi, heldur einnig á samfélögin í heild sérstaklega í sjávarbyggðum á borð við Vestmannaeyjar.

„Við erum að vonast til að þessi fundur og það sem farið verður yfir þar fái vandaða skoðun og að tekið verði tillit til þess við endanlega ákvörðun um hækkun veiðigjalda,“ segir Sindri í samtali við Eyjafréttir.

Bíður svara frá stjórnarþingmönnum

Hann segir að forsvarsmenn þessara félaga telji nauðsynlegt að hitta kjörna fulltrúa aftur sér í lagi þar sem löggjafarvaldið hafi framan af þessari umræðu verið með ranga útreikninga til umfjöllunar.

Spurður um hvaða þingmenn hafi meldað sig til fundarins segir Sindri að það séu þingmenn Framsóknar, Miðflokks og Sjálfstæðisflokks. „Enn sem komið er hefur enginn stjórnarþingmaður staðfest mætingu en ég vænti þess að það muni koma þegar líður á daginn,“ segir hann og bætir við að fundað verði klukkan 15.00.