Eins og fram hefur komið halda Vinir og vandamenn þátttökutónleika í Höllinni í kvöld, þann 4. júlí og þar ætla þeir ekki aðeins að flytja eldri Eyjalög heldur verða einnig frumflutt tvö ný, sem bæði krefjast virkrar þátttöku áhorfenda. Það fyrra heitir, „Kappar þrír“ og er fjögurra erinda hetjukvæði eftir Leif Geir Hafsteinsson um þá Oddgeir Kristjánsson, Árna úr Eyjum og Ása í Bæ. 

„Við erum mætt á Eyjuna fögru og hlökkum mikið til kvöldsins,“ sagði Leifur Geir Hafsteinsson, einn Vina og vandamanna. „Að baki liggur mikil vinna, þrotlausar æfingar og ég get lofað flottum tónleikum. Það gefur okkur líka aukinn kraft að koma til Eyja og upplifa stemninguna á þeim tímamótum sem Goslok eru. Við köllum þetta þátttökutónleika því þegar fjórir eða fleiri Eyjamenn koma saman er alltaf stutt í sönginn. Við vonumst til á sjá sem flesta og saman fyllum við Höllina af söng í kvöld,“ sagði Leifur Geir. 

Með fréttinni fylgir myndband Vina og vandamanna af laginu “Við dýrkum Eyjar” sem frumflutt verður á tónleikunum í kvöld. 

Liðsmenn lýsa tónlistarstefnunni sem Eyja-kántrý-gospeli og textinn, sem Leifur Geir semur, er hálfgerð trúarjátning til Eyjanna og þeirra undursamlegu tilfinninga sem vakna þegar mætt er á Eyjuna fögru.