Giggó — nýtt app úr smiðju Alfreðs

Alfreð ehf. fagnaði ársbyrjun 2024 með því að skjóta á loft nýju appi sem kallast Giggó. Landsmenn hafa þar með fengið aðgang að markaðstorgi fyrir gigg af öllu tagi, bæði fyrir verktaka og fólk sem vill kaupa þjónustu þeirra.

Í rúman áratug hefur Alfreð verið leiðandi í að tengja saman fólk og fyrirtæki og koma á starfssamningum milli starfsfólks og atvinnurekenda. Hugmyndin um að búa til samsvarandi lausn fyrir verktaka, einyrkja og sjálfstætt starfandi hæfileikafólk féll því einkar vel að þeirri reynslu og þekkingu sem fyrir er innan fyrirtækisins. Eftir góðan sprett við hönnun og þróun appsins hefur Giggó litið dagsins ljós.

Fimm stjörnu viðtökur

Á Giggó er hægt að setja inn smáauglýsingu og óska eftir hverskonar giggurum, allt frá veislustjórn og málningavinnu til Sorpuferða. „Viðbrögðin hafa ekki látið á sér standa og fjöldi giggara hefur nú þegar skráð sig. Þau eru öll boðin og búin að taka næsta gigg. Fyrsta giggið fékk fimm stjörnur þannig að þetta byrjar vel,“ segir Anna Katrín Halldórsdóttir framkvæmdastjóri Alfreðs og Giggó og þakkar öllum þeim giggurum sem þegar hafa skráð sig á Giggó.

Þegar gigg er afgreitt á Giggó er hvatt til að gefa giggaranum stjörnur fyrir frammistöðuna. Eftir því sem notkunin eykst og verkefnum vindur fram fá notendur skýrari mynd af því hvaða giggarar skara fram úr í sínu fagi, m.a. út frá stjörnugjöf og umsögnum. Að þessu leyti felur Giggó í sér notendastýrt gæðakerfi líkt og sjá má á öðrum markaðstorgum á borð við Uber eða Airbnb. Giggó er því upplagt tækifæri fyrir upprennandi giggara til að geta sér gott orð á sínu sviði.

Giggó og landsbyggðin

Það verður spennandi að sjá hvernig landsbyggðin tekur Giggó og ekki síst hvort staðbundin menning og atvinnulíf birtist í notkun appsins. Bændur á Íslandi eru t.d. annálaðir giggarar og þúsundþjalasmiðir og stökkva iðulega í íhlaupavinnu milli háannatíma í sveitinni. Þeir eiga fullt erindi á Giggó og geta svo líka nýtt appið til að auglýsa dagsverk við smölun eða í girðingarvinnu. Möguleikarnir eru ótæmandi. Í sjávarbyggðum gæti Giggó hjálpað til við að bjarga verðmætum afla. Loks er hægt að ímynda sér kvikmyndafyrirtæki við tökur í fögrum dal sem vantar aukaleikara með skömmum fyrirvara. Með því að sækja talentinn í nærsveitir mundi smáauglýsing á Giggó borga sig margfalt með sparnaði í uppihaldi og ferðakostnaði. Hvað sem öðru líður þá er Giggó frábært tækifæri og gæti orðið öflugt krydd í atvinnulífið á landsbyggðinni. „Með Giggó verður til samfélag fyrir þau sem starfa sjálfstætt, þægilegri leið til að redda næsta giggi án þess að þurfa að harka. Við sjáum fyrir okkur að Giggó muni á næstu árum gjörbreyta landslaginu að þessu leyti. Á Giggó eigum við öll að geta fundið sérfræðinga eða fagfólk sem er laust í gigg þegar á þarf að halda,“ segir Anna Katrín.