Í gærkvöldi afhenti Sigurjón Óskarsson Félagi eldri borgara í Vestmannaeyjum (FebV) nýtt leiktæki sem hann lét sérstaklega smíða fyrir félagið. Sigurjón bað svokallaða karla í skúrum, sem koma saman reglulega og fást við ýmis smíðaverk, um að taka að sér verkefnið. Tóku þeir vel í beiðnina og smíðuðu traust og glæsilegt leiktæki sem nú mun koma félaginu að góðum notum. Trausti Traustason sá svo um að mála tækin.

Afhendingin fór fram í húsnæði félagsins og skapaðist þar skemmtileg og hlýleg stemning þegar Sigurjón afhenti gjöfina formlega. Gjafir sem þessar styrkja starfsemi Félags eldri borgara í Eyjum og eru kærkomin viðbót við þá aðstöðu sem félagsmenn hafa til afþreyingar og samveru. Óskar Pétur Friðriksson, ljósmyndari Eyjafrétta var á staðnum og myndaði viðburðinn og má sjá fleiri myndir hans hér að neðan.