Frá og með deginum í dag, þriðjudaginn 6. apríl verður hægt að kjósa utan kjörfundar í sveitastjórnarkosningum. Kosið verður 29. maí næstkomandi en frestur til að skila inn framboðslista rennur út 8. maí næstkomandi. Og þá vandast málið. Hvað á að kjósa? Eins og staðan er í dag liggur ekki ljóst fyrir hvaða framboð hægt verður að kjósa um 29. maí næstkomandi. Þó er nokkuð ljóst að Sjálfstæðisflokkur og Vestmannaeyjalistinn muni bjóða fram en þessir tveir listar mynda bæjarstjórn í dag þar sem Sjálfstæðismenn eru með fjóra bæjarfulltrúa en Vestmannaeyjalistinn þrjá. Samfylkingin, Vinstri-Grænir og óháðir standa að Vestmannaeyjalistanum.