Félagið Eyjagöng ehf., sem undirbýr gerð jarðganga á milli lands og Eyja, hefur tryggt sér stóran hluta af 200 milljóna króna fjármögnunarmarkmiði sínu. Þetta kemur fram í tilkynningu frá félaginu. Þar segir jafnframt að ólíkt mörgum öðrum þróunarverkefnum, er hér ekki einungis um loforð að ræða, því lykilfjárfestar hafa þegar gengið frá greiðslu á hlutafé sínu. Félagið var stofnað fyrir 2 mánuðum og mun hefja framkvæmdir í mars.

Í hópi þeirra sem þegar hafa gerst hluthafar er Íslandsbanki, en aðkoma bankans er talin mikilvægur gæðastimpill á verkefnið. Þá hafa burðarásar í atvinnulífi Vestmannaeyja, Ísfélag og Vinnslustöðin, þegar greitt fyrir sína hlutdeild, ásamt Vestmannaeyjabæ og Rangárþingi eystra. Aðaleigendur og stofnendur Laxeyjar í gegnum Sion ehf. og DVG Fasteignafélag eru einnig komnir í hluthafahópinn.

Í tilkynningunni er haft eftir Árna Sigfússyni, formanni félagsins að það sendi sterkt merki inn í viðskiptalífið að þessir öflugu aðilar séu ekki bara að styðja verkefnið í orði, heldur séu þeir þegar búnir að leggja fram fjármagnið. „Með Íslandsbanka og helstu atvinnufyrirtæki svæðisins í hluthafahópnum er ljóst að trúin á verkefnið er mikil. Við erum nú að klára viðræður við væntanlega fjárfesta í þessari lotu.“

Stefnt er að því að ljúka hlutafjáraukningunni á næstu vikum, segir að endingu í tilkynningunni.