Ný skoðanakönnun Gallup sem birt er á fréttavefnum Vísi í dag sýnir að Sjálfstæðisflokkurinn mælist með mest fylgi í Vestmannaeyjum, eða 43,9 prósent. H-listinn, sem klofnaði út frá Sjálfstæðisflokknum árið 2018, mælist með 27,3 prósent fylgi, Eyjalistinn með 19,7 prósent og Miðflokkurinn með 9,2 prósent. Könnunin var framkvæmd frá 15. janúar til 2. febrúar og endurspeglar hug kjósenda áður en Miðflokkurinn tilkynnti framboð sitt í Eyjum. Miðflokkurinn tilkynnti formlega um framboð sitt 3. febrúar og verður þetta í fyrsta sinn sem flokkurinn býður fram í sveitarfélaginu í sveitarstjórnarkosningum.

Ánægja með bæjarstjórann

Þrátt fyrir að Sjálfstæðisflokkurinn mælist með mest fylgi, sýnir könnunin einnig að tæplega 70 prósent Vestmannaeyinga eru ánægðir með störf Írisar Róbertsdóttur bæjarstjóra, sem hefur gegnt embættinu frá árinu 2018. Af þeim sem tóku afstöðu sögðust 30,8 prósent mjög ánægð með störf hennar og 35,6 prósent frekar ánægð. 23,1 prósent frekar óánægð og 10,4 prósent sögðust mjög óánægð.

Þátttakendur í könnuninni voru 320 manns og um 36,4 prósent þátttökuhlutfall, segir í umfjöllun Vísis.

Samanburður við sveitarstjórnarkosningarnar 2022

Í sveitarstjórnarkosningunum 2022 fékk Sjálfstæðisflokkurinn 44,1 prósent atkvæða og fjóra fulltrúa í bæjarstjórn, H-listinn (Fyrir Heimaey) fékk 35,7 prósent og þrjá fulltrúa, en Eyjalistinn fékk 20,2 prósent og tvo fulltrúa. Meirihluti bæjarstjórnar er sem kunnugt er, myndaður af H-listanum og Eyjalistanum.

Nýja könnunin bendir til þess að Sjálfstæðisflokkurinn hafi haldið fylgi sínu frá síðustu kosningum, á meðan H-listinn mælist með minna fylgi en áður. Eyjalistinn er með svipað fylgi og hann fékk í síðustu kosningum. Þetta gæti haft áhrif á myndun meirihluta eftir næstu kosningar, sérstaklega með tilliti til þess að Miðflokkurinn hefur nú tilkynnt framboð sitt og gæti haft áhrif á valdahlutföllin í bæjarstjórn. Sveitarstjórnarkosningar fara fram 16. maí nk..