Lundaveiðitímabilið 2022 – Áskorun til bæjaryfirvalda

Eyjafréttir
·
Fréttir
·
4. apríl 2022

Nú styttist í að lundinn fari að láta sjá sig í Vestmannaeyjum. Reglan er að hann sest upp um miðjan apríl. Í fyrra kom mikið magn af lunda til Vestmannaeyja, svo mikið að sumir töluðu um að varla hefði sést annað eins. Um mitt sumar hvarf lundinn í nokkurn tíma en kom svo aftur í miklu magni í lok Júlí. Lundaveiði hefur minnkað mikið í Eyjum og má rekja það til þess að magn Lunda í Eyjum minnkaði mikið rétt eftir aldamót og er það talið meiga rekja til minnkandi fæðu við Vestmannaeyjar. Síðastliðin 3-4 ár hefur þróunin verið í rétta átt og hefur það ekki síst sést á miklu magni af pysju sem hefur komið í bæinn síðustu ár.

Langflestir lundaveiðimenn fara í lunda til að ná kannski í soðið en ekki til að selja. Búið er að stytta veiðitímabilið mikið þannig að aldrei verður hægt að ná þeirri miklu veiði sem áður var og kannski engin ástæða til þess í dag. Við höfum nefnilega komist að því að það er miklu skemmtilegra að horfa á lundann en að veiða hann.
Hefðin er samt góð og mikilvægt að halda í hana. Það er gaman að fara með börnunum sínum og leyfa þeim að taka í háf. Fyrir nokkrum árum var ákveðið að setja nær alla Heimaey í sérstakt veiðifélag. Ein af rökunum fyrir því var að þá myndu veiðitölur skila sér betur. Samt var það nú þannig að allir þeir sem stunda lundaveiðar þurfa að vera með veiðikort og skila inn veiðitölum fyrir næsta tímabil. Í samtali mínu við starfsmann náttúrustofu nokkrum árum eftir að veiðifélagið var sett á þá sagði hann að veiðitölur hefðu ekki skilað sér eins og reiknað hefði verið með.
Því vil ég skora á bæjaryfirvöld að leyfa aftur almenningi sem náð hefur sér í veiðikort að veiða í öllum fjöllum á Heimaey enda engin rök fyrir að hafa þessi fjöll í veiðifélagi líkt og úteyjarnar þar sem færa má rök fyrir öryggissjónarmiðum, þar sem þessi félög halda úti veiðikofum sem gætu verið mikilvægir ef menn t.d. ílengjast í Eyjunum. Hugsanlega mætti halda Ystakletti utan við þetta vegna langrar hefðar.
Í dag er öllum sem ekki eru í þessu félagi beint í Sæfellið sem varla getur talist gott vegna mikils álágs á fjallið og lundann þar, í stað þess að álagið dreifist um öll fjöllin.

Auðvitað geta menn haldið áfram að vera með félag en óþarfi að gera það að skyldu að ganga í þetta félag til að fá að veiða á Heimaey.

Egill Arnar Arngrímsson

Nýjustu fréttir

Fréttir

Appelsínugul viðvörun: Suðaustan rok og stórhríð

Fréttir

Aðalfundur krabbavarnar í gær

Aðsend grein

Vestmannaeyjar skila milljörðum – en fá hvað í staðinn?

Íþróttir

Íþróttamaður mánaðarins – Haukur Leó

Áhugavert

Bæjarfulltrúar tjá sig ekki um útboð heilsuræktar

Íþróttir

Úrslitakeppnin af stað – ÍBV tekur á móti KA

Fréttir

Árni Sigfússon – Um Eyjagöng

Áhugavert

Bjartsýni á framtíð Eyjanna á erfiðum tímum

Mest lesið

Sjóveiki

Hvað er sjóveiki?

Sjóveiki er misræmi milli skynfæra líkamans sem senda boð til heilans um hreyfingu – kyrrstöðu.

Þegar einstaklingur er úti á sjó þá nema skynjarar í vökvafylltum gangi í innra eyra hreyfingu og senda boð til heilans að einstaklingur sé á hreyfingu. Augun senda hins vegar boð til heilans um að viðkomandi sé kyrr. Heilinn á erfitt með að vinna úr þessum misvísandi og ósamræmdu upplýsingum og sendir skilaboð til magans um að tæma sig – þ.e. veldur uppköstum.

Einkenni sjóveiki eru þreyta, ógleði, svimi, svitakóf og uppköst.

Góð ráð til að hindra sjóveiki:

Góð hvíld daginn fyrir brottför. Að fara seint að sofa og snemma um borð í bát fer ekki vel saman ef fólk er hætt við sjóveiki.

Forðist áfenga drykki daginn fyrir brottför

Forðist djúpsteiktan, brasaðan eða saltan mat daginn fyrir siglingu.

Borðið góðan morgunverð. Borðið gjarnan hvítt brauð, hafragraut og ávexti þó ekki sítrus ávexti.

Forðist mikið koffein. Mikið kaffi er ekki það sem maganum líkar fyrir sjóferð.

Hafðu mat með þér á sjó. Gott er að hafa samlokur með kjúklingi eða kalkún. Kjötið er fitusnautt og brauðið er róandi í maga. Hafðu endilega eitthvað til að grípa í sem er létt í maga. Bananar eru mjög góðir til að narta í ef þú finnur fyrir ógleði en einnig er gott að hafa létt kex eða annað sem er ekki salt eða fitumikið.

Drekkið vel af vatni en einnig er gott er að drekka kóla drykki eða engiferöl í sjóferðinni

Lyf við sjóveiki þ.e. lyf sem slá á einkennin og fást án lyfseðils í apóteki.

Koffínátín – fæst án lyfseðils

Postafen – fæst án lyfseðils

Scopolamin plástur – lyfseðilsskyltEinnig má fá armbönd gegn ferðaveiki sem sumir telja að hjálpi.

Önnur ráð:

Engifer er jurt sem nýlega hefur fengið aukna athygli vegna þess að því er haldið fram að hún geti slegið á ógleði sem fylgir sjóveiki. Til forna tuggðu kínverskir sjómenn engiferrót til að draga úr sjóveiki. Flest lyf sem virka á ógleði verka á heilann en engifer virkar aðeins á magann. Ráðlagt er að taka 1000 mg. hylki hálftíma fyrir brottför. Einnig má taka eitt eða tvö 500 mg. hylki sem eru til viðbótar á ferðalaginu. Ekki er ráðlagt að drekka coke með engifertöflum.

Piparminta og te eru einnig gömul húsráð við ferðaveiki.

Sumum finnst betra að taka sýrujafnandi töflur, Alminox eða slíkt áður en þú heldur á sjó og þá er gott að hafa box með út á sjó.

Hvar í skipinu er best að vera o.fl.

Minna finnst fyrir hreyfingu og veltingi ef maður er staddur næst miðju bátsins.

Mörgum finnst gott að vera í kulda, t.d.að vera úti á dekki og láta vindinn leika um sig.

Matarlykt fer illa í þá sem hætt er við sjóveiki og einnig pústið frá bátnum.

Þungun:

Þungaðar konur sem þjást af sjóveiki mega nota koffinátín í litlum skömmtum en best er að ráðfæra sig við lækni eða lyfjafræðing.
Þunguðum konum er ekki ráðlagt að nota engifer þar sem það er ekki staðfest hvort það geti haft skaðleg áhrif á fóstur.

Nýjustu fréttir

Góð ráð fyrir siglingu

Sjóveiki