Magnús Bragason hefur um árabil verið virkur í samfélaginu hér í Eyjum og lagt sitt af mörkum á hinum ýmsum sviðum. Hann er á meðal skipuleggjenda Vestmannaeyjahlaupsins og The Puffin Run, auk þess að standa að Lundaballinu. Við fengum að heyra aðeins í Magnúsi og varpa nokkrum spurningum til hans.

Fjölskylda: Við Adda eigum þrjá syni, þrjú barnabörn og eitt á leiðinni.

Mottó: Gera mitt besta og njóta dagsins í dag. Gærdagurinn er liðinn og honum verður ekki breytt. Morgundagurinn er ófyrirsjáanlegur. Dagurinn í dag er gjöf. Njóttu hans!

Síðasta hámhorfið: Toxic town á Netflix. Hlakka til að sjá Stranger Things 5 sem kemur út á afmælisdeginum mínum 26. nóvember.

Uppáhalds hlaðvarp? Langa með Snorra Björns.

Aðaláhugamál: Golf, hlaup og ferðalög.

Eitthvað sem þú gerir á hverjum degi sem þú gætir ekki verið án: Knúsa einhvern.

Hvað óttast þú mest: Lokast inni.

Hvað er velgengni fyrir þér: Að ná markmiðum sínum.

Hvenær kviknaði áhugi þinn á hlaupum og hvað er það besta við hlaupin? Adda tók þátt í hálfu maraþoni 2005 og ég ákvað að taka 10 km án mikils undirbúnings. Kom örmagna í mark en heillaðist að stemningunni. Byrjaði þá að æfa reglulega og tók þátt í hálfu og síðan heilu maraþoni. Það bætir heilsuna að hlaupa, bæði líkamlega og andlega. Að taka þátt í hlaupaviðburðum bæði hér og erlendis er mjög skemmtilegt.

Hvað mundirðu segja að væri helsta áskorunin við skipulagningu hlaupa eins og Vestmannaeyjahlaupið? Að fá hlaupara til að taka þátt. Einnig að fá fólk til að starfa, þar erum við í Eyjum rík.

Hvað er það skemmtilegasta við Lundaballið og hvað gerir það svo sérstakt? Góður matur úr okkar náttúru. Söngur, grín og dans. Allir velkomnir!

Eitthvað að lokum? Við erum heppin að búa hér í Eyjum. Verum góð við hvert annað. Miðasala á Lundaballið er hafin og skráning í The Puffin Run hefst 26. nóvember!