Embætti Lögreglustjórans í Vestmannaeyjum hefur náð eftirtektarverðum áfanga í jafnréttismálum. Í fyrsta sinn eru nú jöfn hlutföll karla og kvenna bæði meðal starfsfólks embættisins og í útkallsliði lögreglu. Jafnframt mældist embættið hæst allra löggæslustofnana landsins þegar kemur að jafnrétti í könnun Sameykis um Stofnun ársins 2025 – árangur sem endurspeglar markvissa vinnu og sterka liðsheild. Frá þessu er greint á facebooksíðu lögrerglunnar í Vestmannaeyjum.

Tilkynningin í heild sinni:

Við erum stolt af því að tilkynna að nú eru jöfn hlutföll karla og kvenna við embætti Lögreglustjórans í Vestmannaeyjum. Eru hlutföllin jöfn meðal starfsfólks embættisins sem og í útkallsliði lögreglu.

Sömuleiðis mældist embætti Lögreglustjórans í Vestmanneyjum hæst allra löggæslustofnanna í þeim þætti sem snýr að jafnrétti í könnun Sameykis um Stofnun ársins 2025.

Við erum hæstánægð með þennan árangur og auðvitað starfsfólk embættisins sem á stærstan þátt í þessum frábæra árangri.