Eru flutt í Prentsmiðjuna við Hlíðarveg, Prentsmiðjuna Gym og bjóða í vetur upp á fjölbreytta stundatöflu – Opin vika í gangi

Það voru gæfuspor þegar ég í fyrsta skipti steig inn fyrir dyr á Hressó um miðjan apríl 1995. Þá varð til taug sem ekki slitnaði í rúma 30 ár fyrr en stöðinni var lokað þann fyrsta júní í sumar.  Fjórum sinnum í viku mætti maður á Hressó til að streða og teygja stirðan kroppinn. Hélt sama takti í fríum og hafði fyrir reglu að mæta í fyrsta tíma sem í boði var þegar komið var heim.

Það er margt sem kemur upp í hugann á þessum tímamótum en allt er breytingum háð, Slippurinn að skella í lás og Guðmunda og Viðar hætt að selja besta frysta fisk í heimi. Voru bestu matarkaupin í Vestmannaeyjum en áfram verður hægt að borða frábæran mat í Vestmannaeyjum og ljósið er að Gísli Foster, og eiginkonan Jóhanna, ætla að halda áfram í Prent Gym þar sem boðið er upp á fjölbreytta og áhuga verða tíma. Þangað er ég mættur, sakna félaganna á Hressó en er að kynnast nýju fólki og er bara nokkuð sáttur.

Ég og Hressó í tölum

Ef litið til áranna 30 á Hressó gera þau samtals 330 mánuði sem eru 1320 vikur ef reiknað er með fríum. Ekki svo lítill tími í æfi eins manns og ef dýpra er farið þá hef ég mætt á Hressó í 5280 daga á þessum 30 árum og eru tímarnir í leikfiminni jafn margir. Með streði og spjalli og tilheyrandi má bæta hálftíma við þannig að allt með öllu hef ég verið í 7920 klukkutíma á Hressó. Mínútur í leikfiminni eru 712.800 og mínútur á Hressó 1.069.200. Samtals hafa rúm 14 ár af þessum 30 tengst Hressó með einum eða öðrum hætti.

Á Hressó réðu systurnar Anna Dóra og Jóhanna Jóhannsdætur ríkjum og stýrðu af miklum myndarskap. „Upphafið að stofnun Hressó er að við systur bjuggum á höfuðborgarsvæðinu og vorum mjög duglegar að æfa  í nýrri líkamsræktarstöð, Stúdíói Jónínu og Ágústu sem seinna varð Stúdíó Ágústu og Hrafns og nú Hreyfing. Við æfðum á hverjum degi og fannst þetta hrikalega skemmtilegt,“ segir Jóhanna í viðtali við Eyjafréttir. Líkamsræktarstöðin Hressó opnaði þann sjötta janúar 1995. Varð Hressó fljótt ein af stoðum samfélagsins í Vestmannaeyjum.

Var líka félagsmiðstöð

Á Hressó voru hópar sem héldu saman. Þar var morgunhópurinn hennar Önnu Lilju einna sterkastur undir stjórn Drífu Kristjánsdóttur. Sá hópur byrjaði snemma með sína eigin árshátíð og hafa þau farið í ferðir upp á land og til útlanda. „Forest hópurinn hennar Önnu Dóru var líka einstaklega uppátækjasamur. Farið í siglingar, búin til bíómynd, svo fátt eitt sé nefnd. Crossfiteyjar er sérhópur sem hefur farið saman í útivistarferðir. Nýjasti hópurinn voru Freyjurnar, lyftingar klúbbur fyrir konur. Þær halda lyftingardag til að hámarka þyngdir og fara út að borða saman. Svo má ekki gleyma árshátíðunum sem alltaf voru mjög vel heppnaðar og vel sóttar. Framan af ein stærsta skemmtun vetrarins í Vestmannaeyjum og þó víðar væri leitað,“ segir Jóhanna og sjálfur segi ég: Takk fyrir mig.

Nú er það Prentsmiðja Gym

Gísli og Jóhanna hafa síður en svo lagt árar í bát. Eru flutt í Prentsmiðjuna við Hlíðarveg, hafa opnað Prentsmiðjan Gym og bjóða í vetur upp á fjölbreytta stundatöflu og hefst haustið með opinni viku sem hefst í dag, fyrsta september stendur til laugardags sjötta september.

Dagurinn er tekinn snemma, kl. sex þar sem Gísli og Anna Lilja fá fólk til að taka á því. Sæbjörg Loga er morgunlöt og mætir kl. fimm mínútur yfir átta og þá líka heldur betur tilbúin í slaginn. Hún og Gísli skipta hádeginu á sig og þar munu svitadropar falla.

Upp úr fjögur þriðjudaga og fimmtudaga mæta Freyjurnar í tíma sem Kristín Laufey stýrir og rúmlega fimm eru tímar af ýmsu tagi stýrt af Gísla, Kristínu Laufeyju og Elínu Söndru. Loks má nefna tvo yoga tíma klukkan hálf sjö þriðjudaga og fimmtudaga og á sunnudagsmorgnum kl. 11. Á laugardögum eru svo paravinnutímar þar sem 2 og 2 eru hafðir saman í að glíma við verkefni, gríðarlega  skemmtilegir og vinsælir tímar.

Svo er nú kannski það sem kemur mest á óvart, það er hægt að æfa allan sólarhringinn í Prentsmiðjan Gym, Þú bara ræðir við Gísla þegar þú ert kominn með smá traust og færð aðgang til að æfa þegar þér hentar. Hafa margir verið duglegir að nota þetta þann stutta tíma sem að þetta hefur verið við lýði.

Kaffihornið er á sínum stað þegar tími gefst í spjall og örsögur. Opna vikan getur verið upphafið að einhverju svo miklu betra.

Með þökk – Ómar Garðarsson. 

7