Munaðarlausa stúlkan er bók sem Sigurgeir Jónson er að gefa út um þessar mundir. Sagan er gömul þjóðsaga sem Sigurgeir heyrði í útvarpi fyrir mörgum árum. Söguna lagði hann á minnið og hefur svo sagt barnabörnunum við háttatíma. „Afadæturnar mínar taka þessa sögu fram yfir önnur þekktari ævintýri. Ég hef hvergi fundið þessa sögu á prenti og nefndi þetta við Guðjón Inga útgefanda hjá Hólum. Hann féll fyrir sögunni og vildi ólmur gefa hana út fyrir jólin,“ sagði Sigurgeir.
Sunna Einarsdóttir myndskreytti söguna en Sunna er ung listakona frá Vestmannaeyjum. Sunna er hæfileikaríkur listamaður og setur skemmtilegan svip á bókina. „Guðjón spurði mig hvort það væri einhver í Vestmannaeyjum sem gæti hugsanlega myndskreytt bókina, mér datt Sunna strax í hug hafði séð myndirnar hennar og þótti þær henta vel. Hún fékk alveg frjálsar hendur með efnistök ég benti henni á nokkra kafla í bókinni. Sunna valdi að færa myndirnar aðeins nær nútímanum úr þessum gamla torfbæjarstíl sem einkennt hefur íslenskar þjóðsögur. Ég er mjög ánægður með útkomuna“
Sigurgeir afhenti afadætrunum eintak af bókinni í lítilli athöfn að heimili sínu á laugardaginn. Bókin er komin í sölu í Eymundsson.
